კანადის პრემიერი ევროკავშირთან ასოცირებული წევრობის იდეას მიესალმა

ევროპარლამენტში კარნის ძალიან თბილად შეხვდნენ და ხანგრძლივი ტაშით მიესალმნენ. მან თითქმის მთლიანად ტექსტის გარეშე ისაუბრა. კარნი ევროპარლამენტარების ტაშისთვის ხშირად ჩერდებოდა და მათ გამოხმაურებას სიამოვნებით იღებდა. მან ევროპისა და კანადის კიდევ უფრო მჭიდრო თანამშრომლობის თითქმის შეუზღუდავ შესაძლებლობებზე ისაუბრა.

კარნის თქმით, კანადელთა აბსოლუტური უმრავლესობა ევროპასთან გაცილებით მჭიდრო ურთიერთობებს მხარს უჭერს. მან უსაფრთხოებისა და ეკონომიკის სფეროებში უნიკალური ალიანსის შექმნაზე ისაუბრა. კარნი ევროკომისიის პრეზიდენტ ურსულა ფონ დერ ლაიენის წინადადებას მიესალმა. ოთხშაბათს ფონ დერ ლაიენმა კარნი ევროპარლამენტში ევროკავშირის მდგომარეობის შესახებ გამოსვლაზე საპატიო სტუმრად მიიწვია. მან კანადის პრემიერს განსაკუთრებული წინადადება შესთავაზა: პარტნიორობის ახლებური მოდელი კანადას ევროკავშირთან მჭიდროდ დააკავშირებდა.

ფონ დერ ლაიენმა „ასოცირებული“ წევრობა ახსენა, რომელსაც ევროკავშირის სამართალი ჯერჯერობით არ ითვალისწინებს. ევროკავშირის სრულუფლებიანი წევრები მხოლოდ ევროპული სახელმწიფოები შეიძლება გახდნენ. ამიტომ შესაძლოა წევრობის განსაკუთრებული ფორმა შეიქმნას, რომელიც ხმის უფლებას და ევროკავშირის პოლიტიკური გადაწყვეტილებების მიმღებ ორგანოებში ადგილებს არ ითვალისწინებს. ასეთ ორგანოებს შორის ევროპარლამენტი და ევროკავშირის მინისტრთა საბჭოა.

კანადასა და ევროკავშირს თანამშრომლობის კიდევ უფრო გაძლიერება სურთ, თუმცა მისი ზუსტი ფორმა ჯერჯერობით გაურკვეველია.

კანადის პრემიერმა ევროპარლამენტში განაცხადა, რომ ევროპა და კანადა ერთად უფრო ძლიერები არიან. მისი თქმით, განსაკუთრებით მჭიდრო პარტნიორობა ორივე მხარისთვის მნიშვნელოვანია და არსებულ შეთანხმებებს მნიშვნელოვნად უნდა გასცდეს. მათგან უმთავრესი CETA-ს სავაჭრო შეთანხმებაა, რომელიც უკვე ცხრა წელია „დროებით“ მოქმედებს.

კარნიმ მას წარმატებული მოდელი უწოდა. ერთი დღით ადრე შეთანხმება ასე ფონ დერ ლაიენმაც შეაფასა. ამასთან, ევროკავშირის რამდენიმე სახელმწიფოსთან პრობლემები კვლავ რჩება. ამ ქვეყნებს შეთანხმება სრულად არ დაუმტკიცებიათ, რადგან კანადის სოფლის მეურნეობის სექტორისგან შესაძლო კონკურენციას უფრთხიან. კარნის თავის გამოსვლაში რატიფიცირება არ მოუთხოვია, მით უმეტეს, რომ პასუხისმგებელი პირები დარბაზში არ იმყოფებოდნენ. თუმცა ამ საკითხის განხილვას მონრეალში ევროკავშირისა და კანადის მოახლოებულ სამიტზე ელიან.

დაახლოების საბოლოო შედეგი შეიძლება „ევროკავშირის მსუბუქი წევრობის“ ერთგვარი ფორმა გახდეს. ასეთი თანამშრომლობა სრულუფლებიანი წევრის ყველა უფლებასა და ვალდებულებას არ მოიცავს, თუმცა მრავალ სარგებელს ითვალისწინებს. ეს შეიძლება სტუდენტებისთვის Erasmus-ის პროგრამაში მონაწილეობას და ადამიანების თავისუფალ გადაადგილებას შეეხოს. შესაბამისად, ევროკავშირის მოქალაქეებს კანადაში დასახლებისა და სამუშაოს ძიების შესაძლებლობა ექნებოდათ, კანადელებს კი ევროკავშირში. კარნი ამ შესაძლებლობასაც მიესალმა.