ხელოვნური ინტელექტის ჩიპები ელექტრონიკას აძვირებს

იქნება ეს კომპიუტერი, სმარტფონი თუ მეხსიერების ბარათი, საშობაო სეზონზე მომხმარებლებს ელექტრონული პროდუქციის არაერთ სახეობაში მეტის გადახდა მოუწევთ. მიზეზი მეხსიერების ჩიპების გაძვირებაა.

ელექტრონიკის საცალო ვაჭრობის კომპანია MediaMarktSaturn-ის წარმომადგენელმა განაცხადა: „ნახევარგამტარებისა და მეხსიერების კომპონენტების მუდმივი დეფიციტი ამჟამად აძვირებს ისეთ პროდუქტებს, როგორიცაა პერსონალური კომპიუტერები, სმარტფონები და SSD-ები“. მისი თქმით, მწარმოებლები გაზრდილ ხარჯებს სულ უფრო ხშირად მომხმარებელს აკისრებენ. მოგების მარჟის შესანარჩუნებლად, ფასების შემდგომი ცვლილებაც გამორიცხული არ არის. წარმომადგენლის თქმით, ვითარების შემდგომი განვითარება დიდწილად იმაზეა დამოკიდებული, რამდენად სწრაფად დასტაბილურდება ჩიპებისა და მეხსიერების წარმოება.

ბაზრის კვლევის კომპანია NIQ-ის ცნობით, IT-პროდუქტებში, ხარჯების ზრდა მეხსიერების ჩიპების შემცველ თითქმის ყველა კატეგორიას შეეხო. NIQ-ის ექსპერტმა ანდრეას პეპლინსკიმ თქვა: „მომხმარებლები ამ გავლენას უკვე აშკარად გრძნობენ“. მისი თქმით, ბოლო პერიოდში IT-პროდუქტების დიდი ნაწილის სამომხმარებლო ფასები სწრაფად გაიზარდა.

NIQ-ის მონაცემებით, სექტემბერში ვიდეოდაფების საშუალო ფასი თითქმის ორჯერ მეტი იყო, ვიდრე წინა წლის იმავე თვეში. დესკტოპ-კომპიუტერები 41%-ით გაძვირდა, ლეპტოპებისა და პლანშეტების ფასები კი ორნიშნა პროცენტული მაჩვენებლით გაიზარდა. სმარტფონებზეც ფასების მნიშვნელოვანი მატება შეინიშნებოდა.

მაღაზიებში ფასების მკვეთრი ზრდის უკან დგას საბაზრო მოვლენა, რომელიც ნახევარგამტარების ინდუსტრიას ათწლეულებია ახასიათებს: ე.წ. „ღორის მუცლის ციკლი“. ტერმინი თავდაპირველად სოფლის მეურნეობასა და სასაქონლო ფიუჩერსების ბაზარზე გაჩნდა. ღორის ხორცზე მაღალი ფასები ფერმერებს ახალი ცხოველების მასობრივად მოშენებისკენ უბიძგებდა. თვეების შემდეგ კი ჭარბი მიწოდება ფასების მკვეთრ ვარდნას იწვევდა, რასაც დეფიციტი მოჰყვებოდა, რადგან წარმოება მოთხოვნას ერთბაშად ვერ ერგება.

ჩიპების ინდუსტრიაში ეს ასე აისახა: კოვიდპანდემიის დროს მოთხოვნის მკვეთრი ზრდის შემდეგ, მეხსიერების ჩიპების მსოფლიო ბაზარი ღრმა კრიზისში ჩავარდა. საწყობები გაივსო, ოპერატიული მეხსიერებისა (DRAM) და ფლეშ-მეხსიერების (NAND) ფასები კი მკვეთრად დაეცა.

ფასების დამანგრეველი ვარდნის შესაჩერებლად და მილიარდობით დოლარის ზარალის თავიდან ასაცილებლად, ინდუსტრიის წამყვანმა კომპანიებმა, მათ შორის Samsung-მა, SK Hynix-მა და Micron-მა, წარმოება მკვეთრად შეამცირეს. მათ საწარმოო ხაზები გააჩერეს და ახალი ქარხნების ასაშენებლად განკუთვნილი მილიარდობით დოლარის საინვესტიციო პროგრამები გაყინეს.

მწარმოებლების გათვლამ გაამართლა, თუმცა ახლა ვითარება საპირისპირო მიმართულებით მკვეთრად შეიცვალა. მიწოდება ხელოვნურად შეიზღუდა, მოთხოვნა კი ხელოვნური ინტელექტისთვის მონაცემთა ცენტრების მსოფლიო მასშტაბით გაფართოების გამო სწრაფად გაიზარდა. ტექნოლოგიური კომპანიები ამჟამად მეხსიერების კომპონენტებს უზარმაზარი რაოდენობით ყიდულობენ.