კონგრესმა Nvidia-ს ხელმძღვანელი ჯენსენ ჰუანგი ჩინეთის ჯაშუშობის საქმეზე დაიბარა

Nvidia-ს აღმასრულებელ დირექტორს, ჯენსენ ჰუანგს, სავარაუდოდ, უამრავი შეხვედრა აქვს და დღეს მის დატვირთულ განრიგს კიდევ ერთი დაემატა. აშშ-ის კონგრესს ჰუანგთან დახურულ კარს მიღმა საუბარი სურს, რადგან ეროვნული უსაფრთხოების საკითხებზე შეშფოთება იზრდება. შეხვედრის ინიციატორი კონგრესმენების თქმით, გადაწყვეტილება გასულ კვირას გავრცელებულმა ცნობამ განაპირობა. მასში ნათქვამია, რომ შესაძლოა, ჰუანგი ჯაშუშობის სამიზნე იყოს, ხოლო სავარაუდო ჩინელი აგენტი სინგაპურში მოქმედი კომპანია „მეგასპიდის“ (Megaspeed) აღმასრულებელი დირექტორი ელის ჰუანგია. მათ ნათესაური კავშირი არ აქვთ.

შეხვედრა რესპუბლიკელმა წარმომადგენელთა პალატის წევრებმა, ჯონ მულენარმა, ბრაიან მასტმა და რიკ კროუფორდმა მოაწყვეს. ისინი, შესაბამისად, პალატის ჩინეთის, საგარეო საქმეთა და დაზვერვის კომიტეტებს ხელმძღვანელობენ. საკითხზე პალატის წერილში კანონმდებლები ამბობენ, რომ გავრცელებული ცნობები „ეროვნული უსაფრთხოების მნიშვნელოვან შეშფოთებას იწვევს“ ჩინეთის მიერ აშშ-ის ტექნოლოგიებსა და ინფორმაციაზე წვდომის გამო.

მანამდე გავრცელებული ბრალდების თანახმად, ელის ჰუანგი სინგაპურში მოქმედ მონაცემთა ცენტრების კომპანია „მეგასპიდში“ ჩინეთის სასარგებლოდ მუშაობს და ინფორმაციას პეკინს აწვდის. უოლ სტრიტ ჯორნალის (The Wall Street Journal) ცნობით, ჩინეთის ხელისუფლებამ ის ჯენსენ ჰუანგთან არსებული ურთიერთობის გამო დაიქირავა.

ნიუ-იორკ ტაიმსის (The New York Times) ცნობით, „მეგასპიდმა“ Nvidia-ს ჩიპები მილიარდობით დოლარად იყიდა და შესყიდვას კვლავ აგრძელებს. აშშ-ის ვაჭრობის სამინისტრო კომპანიას 2024 წლიდან ჩინეთში 2 მილიარდი დოლარის ღირებულების მოწინავე ნახევარგამტარების კონტრაბანდას ედავება.

ამ ვითარების ფონია აშშ-ის ხანგრძლივი საექსპორტო შეზღუდვები, რომლებიც Nvidia-სა და AMD-ს ჩინეთში და სხვა ქვეყნებში ხელოვნური ინტელექტის ყველაზე მოწინავე ამაჩქარებელი ჩიპების მიწოდებას უკრძალავს. ბრალდებები გასულ კვირას პირველად ნიუ-იორკ ტაიმსმა გამოაქვეყნა. გამოცემის ცნობით, ინფორმაცია აშშ-ის დაზვერვის ანონიმურ წარმომადგენლებს ეყრდნობა.

წარმომადგენელთა პალატის თქმით, ჯენსენ ჰუანგთან შეხვედრის მიზანია „Nvidia-ს უსაფრთხოების პროტოკოლების განხილვა უცხო ქვეყნის მოწინააღმდეგეთა ჯაშუშობისგან დასაცავად და მისი ურთიერთობის განხილვა [...] ელის ჰუანგთან“. ნიუ-იორკ ტაიმსის ცნობით, აღმასრულებელ დირექტორს არასდროს მიუღია „თავდაცვითი ბრიფინგი“, ანუ გაფრთხილება, რომელიც უცხო ქვეყნის ჯაშუშობის პოტენციურ სამიზნეებს ასეთი საქმიანობის ნიშნებს აცნობს.

გამოცემა აღნიშნავს, რომ დაზვერვის წარმომადგენლები ხშირად თავს იკავებენ ჯაშუშობის პოტენციური სამიზნეების ინფორმირებისგან, რადგან ამან შესაძლოა ჯაშუშს გააგებინოს, რომ მას იძიებენ. ნიუ-იორკ ტაიმსი წერს, რომ პრეზიდენტ დონალდ ტრამპს „მეგასპიდისა“ და ელის ჰუანგის გარშემო ვითარების შესახებ ერთი წლის წინ აცნობეს, თუმცა მან მოქმედება არ გადაწყვიტა.