ქსელის ოპერატორები ენერგეტიკულ პროექტებს წლობით აყოვნებენ

გერმანიაში ელექტროქსელის ოპერატორები სულ უფრო მეტ დავასა და უკმაყოფილებას იწვევენ. კონფლიქტები ქარისა და მზის ელექტროსადგურებისა და ბატარეებში ენერგიის შემნახველი სისტემების ათასობით ოპერატორს ეხება. პრობლემა ასევე აწუხებს სამრეწველო კომპანიებს, მონაცემთა ცენტრებსა და კერძო ოჯახებს.

ზოგი ობიექტი ელექტროქსელთან მიერთებას თვეების განმავლობაში ელოდება. პრობლემებს შორისაა ახალი ელექტრომრიცხველების რეგისტრაციისას დაშვებული შეცდომებიც. თუმცა მთავარი სირთულე ისაა, რომ მომხმარებლები თავიანთ საკითხებზე ქსელის ოპერატორებთან დაკავშირებას უბრალოდ ვერ ახერხებენ.

გარემოსდაცვითი ენერგეტიკული სამართლის ფონდის (Stiftung Umweltenergierecht) წარმომადგენელმა თორსტენ მიულერმა განაცხადა: „ქსელის ოპერატორები მონოპოლისტები არიან. ყველა, ვისაც ელექტროქსელთან მიერთება სჭირდება, მათთან თანამშრომლობაზეა დამოკიდებული“. მისი თქმით, ეს ძალაუფლების უთანასწორობას ქმნის.

ამ უთანასწორობის შედეგებს მომხმარებლები და კომპანიები გრძნობენ. ელექტროენერგიის მიმწოდებელი Rabot Energy-ის გაყიდვების ხელმძღვანელმა კონრად შადემ ქსელის ოპერატორ Westnetz-ზე განაცხადა: „როდესაც მომხმარებელთა პრობლემების მოგვარებაში დახმარებას ვთხოვთ, ქსელის ოპერატორი საერთოდ აღარ გვეხმაურება“.

იურიდიული ფირმა Aecoute-ს ადვოკატმა ჰაიდრუნ შალემ თქვა: „ელექტროქსელის ბევრი ოპერატორი მზისა და ქარის ელექტროსადგურების მმართველთა მოთხოვნებს საერთოდ აღარ პასუხობს. თითქოს ბუნკერში სხედან და ელოდებიან, რომ ახალი კანონები ქსელთან მიერთების ყველა ამ მოთხოვნისგან გაათავისუფლებს“.