ლიეტუვაში დრონის ნაცვლად ფრინველების გუნდი აღმოაჩინეს

ლიეტუვის აეროპორტთან შესაძლო დრონის შემჩნევის გამო ნატოს ავიაგამანადგურებელი აფრინდა. თუმცა, განგაში გაუქმდა, რადგან სავარაუდო საფრთხე ფრინველების გუნდი აღმოჩნდა.

შემჩნევის გამო ვილნიუსის აეროპორტი დაიხურა და რეაგირებისთვის ნატოს სულ მცირე ერთი ავიაგამანადგურებელი გამოიძახეს.

ლიეტუვის კრიზისების მართვის ეროვნული ცენტრის (National Crisis Management Centre) ცნობით, თვითმფრინავმა ობიექტი ვიზუალურად ამოიცნო, რის შემდეგაც საჰაერო განგაში გაუქმდა. აეროპორტი 38 წუთში გაიხსნა.

ცენტრმა განცხადებაში დასძინა: „რადარის თავდაპირველ მონაცემებში ფრინველებისა და დრონების მიერ დატოვებული ნიშნები შეიძლება მსგავსი იყოს“.

თვითმფრინავი ჩრდილოეთ ლიეტუვაში მდებარე შიაულიაიდან გამოიძახეს. ნატოს ბალტიის საჰაერო თავდაცვის მისიის ფარგლებში იქ ამჟამად იტალიის სამხედრო-საჰაერო ძალებია განთავსებული.

ფინეთის, ესტონეთის, ლატვიისა და ლიეტუვის საჰაერო სივრცეში შემთხვევით მოხვედრილი სამხედრო დრონები შეშფოთებას აძლიერებს. არსებობს შიში, რომ უკრაინის ომი რუსეთის საზღვართან მდებარე ნატოს ჩრდილოეთ საზღვრებამდე ვრცელდება.

მანამდე, აგვისტოში, საჰაერო სივრცის საპატრულო მისიის ფარგლებში მოქმედმა ნატოს F-18-ის ავიაგამანადგურებელმა დრონი ჩამოაგდო, რომელიც რუმინეთის საჰაერო სივრცეში უკანონოდ შევიდა.

რადარმა საფრენი აპარატი თავდაპირველად მაშინ დააფიქსირა, როცა ის მეზობელი მოლდოვიდან რუმინეთის ტერიტორიაზე გადავიდა. ეს სამხრეთ-აღმოსავლეთით მდებარე ქალაქ გალაციდან ჩრდილოეთით 24 კმ-ში მოხდა. რუმინეთის თავდაცვის სამინისტროს დრონის წარმომავლობა არ დაუკონკრეტებია, თუმცა ნატოს წარმომადგენლებმა რუსეთთან შესაძლო კავშირზე მიუთითეს.

რუმინეთს უკრაინასთან 614 კმ-ის (381 მილის) სახმელეთო საზღვარი აქვს და ნატოს წევრია. ბოლო ოთხი წლის განმავლობაში ქვეყანამ რუსული დრონების მიერ საჰაერო სივრცის დარღვევის მრავალი შემთხვევა აღრიცხა. ამავე დროს, მოტივტივე საზღვაო ნაღმები შავი ზღვის მნიშვნელოვან სანაოსნო და ენერგეტიკულ მარშრუტებს ემუქრება.

გასული წლის ოქტომბერში რუსული თვითმფრინავების მიერ ლიეტუვის საჰაერო სივრცის დარღვევის საპასუხოდ ნატო იძულებული გახდა, ავიაგამანადგურებლები აეფრინა.

ორმა რუსულმა სამხედრო თვითმფრინავმა, Su-30-ის ავიაგამანადგურებელმა და II-78-ის საწვავით გასამართმა თვითმფრინავმა, ნატოს წევრ სახელმწიფოს დაახლოებით 18 წამის განმავლობაში გადაუფრინა. ამან ალიანსის ოფიციალური რეაქცია გამოიწვია. სამხედრო უწყების ცნობით, ისინი შესაძლოა საწვავით გამართვის სასწავლო მისიას ასრულებდნენ.