მანჩესტერ სიტი 115 ბრალდებიდან 114-ში დამნაშავედ ცნეს

The Athletic-ის ჟურნალისტმა დევიდ ორნსტაინმა პარასკევს ანონიმურ ინფორმირებულ წყაროებზე დაყრდნობით დაწერა, რომ სანქციები ჯერ არ დაუდგენიათ. მისი ცნობით, მანჩესტერ სიტი გადაწყვეტილებას, სავარაუდოდ, გაასაჩივრებს.

სანქციები შესაძლოა მოიცავდეს ქულების დაკლებას, ფინანსურ ჯარიმებს, კლუბის მიერ მოგებული ტიტულების ჩამორთმევასა და პრემიერ-ლიგიდან გავარდნასაც კი.

მანჩესტერ სიტის წარმომადგენელმა, რომლის კლუბიც ბრალდებებს უარყოფს, განაცხადა: „პრემიერ-ლიგის პროცესი გრძელდება, მისი მნიშვნელოვანი ნაწილები ჯერ დასასრულებელია და მკაცრ კონფიდენციალურობას ექვემდებარება. შესაბამისად, მანჩესტერ სიტის პოზიცია 2023 წლის თებერვალში გაკეთებული განცხადების შესაბამისი რჩება.

„კლუბი რვა წლის განმავლობაში კეთილსინდისიერად იცავდა სათანადო პროცედურას. ის ეყრდნობოდა ვარაუდს, რომ პრემიერ-ლიგის საბჭო და ხელმძღვანელობა დამოუკიდებელი, მიუკერძოებელი და სამართლიანი მარეგულირებლის ფუნქციას პარტიული გავლენის გარეშე შეასრულებდნენ“.

არაბთა გაერთიანებული საამიროების სამეფო ოჯახის წევრმა, შეიხ მანსურ ბინ ზაიდ ალ ნაჰიანმა, კლუბი 2008 წელს შეიძინა. მას შემდეგ მანჩესტერ სიტი რიგითი გუნდიდან პრემიერ-ლიგის დომინანტ ძალად გარდაიქმნა.

კლუბმა 10 საჩემპიონო ტიტულიდან რვა ბოლო 15 სეზონში მოიპოვა. 2023 წელს მან პირველი და ჯერჯერობით ერთადერთი ჩემპიონთა ლიგაც მოიგო.

კლუბს ამჟამინდელ სტატუსამდე აღმასვლის პერიოდში ფინანსური წესების დარღვევაში დასდეს ბრალი.

115 ბრალდებიდან 80 2009-2018 წლებში წესების დარღვევას ეხება. დარჩენილი 35 კი პრემიერ-ლიგის გამოძიებასთან თანამშრომლობაზე უარის თქმას უკავშირდება.

ბრალდებები იმ გაჟონილი დოკუმენტებიდან მომდინარეობს, რომლებიც გერმანულმა საინფორმაციო ჟურნალმა შპიგელმა (Der Spiegel) 2018 წელს გამოაქვეყნა.

სავარაუდოდ, მანჩესტერ სიტის მაღალი რანგის ხელმძღვანელებს შორის გაგზავნილი ელექტრონული წერილები აჩვენებდა, რომ კლუბმა სპონსორობიდან მიღებული შემოსავალი ხელოვნურად გაზარდა. საქმე ეხებოდა არაბთა გაერთიანებული საამიროების სახელმწიფოს მიერ კონტროლირებულ ავიაკომპანია ეტიჰადსა (Etihad) და სატელეკომუნიკაციო კომპანია ეტისალატს (Etisalat). წერილების თანახმად, კლუბმა მანსურის აბუ-დაბი იუნაიტედ გრუპის (Abu Dhabi United Group) პირდაპირი ინვესტიცია შემოსავლად წარმოაჩინა.

სხვა დოკუმენტების თანახმად, კლუბი მაშინდელ მთავარ მწვრთნელ რობერტო მანჩინის აბუ-დაბის ერთ-ერთი კლუბისგან საკონსულტაციო გასამრჯელოს სახით აღურიცხავ თანხებს უხდიდა.

მანჩესტერ სიტი ამტკიცებდა, რომ მისი უდანაშაულობის დასადასტურებლად „უტყუარი მტკიცებულებების სრულყოფილი ერთობლიობა“ ჰქონდა.