მანჩესტერ სიტის პრემიერ-ლიგისთვის შესაძლოა 50 მილიონი ფუნტის გადახდა მოუწიოს

სიტი დარღვევას უარყოფს და გადაწყვეტილებას „შეთქმულების თეორიას“ უწოდებს

მანჩესტერ სიტის, თითქმის ყველა წაყენებულ ბრალდებაში დამნაშავედ ცნობის შემდეგ, პრემიერ-ლიგისთვის იურიდიული ხარჯების ასანაზღაურებლად ათობით მილიონი ფუნტის გადახდა მოუწევს.

პრემიერ-ლიგამ სამშაბათს განაცხადა, რომ დამოუკიდებელი კომისიის დასკვნით, კლუბმა ცხრა წლის განმავლობაში შემოსავალი ხელოვნურად 900 მილიონი ფუნტით გაზარდა. კომისიამ დაასკვნა, რომ ხარჯვის წესების დასაკმაყოფილებლად მანჩესტერ სიტიმ შემოსავლების გასაზრდელად „ფიქტიური“ კონტრაქტები გააფორმა.

პროცესის განმავლობაში ორივე მხარის ხარჯმა, ბევრი იურიდიული ექსპერტის პროგნოზით, ჯამში 100 მილიონ ფუნტს გადააჭარბა. მანჩესტერ სიტიმ დაიქირავა ლორდი პანიკი, სამეფო იურისტი და ქვეყნის ერთ-ერთი წამყვანი ადვოკატი. ის ყოფილ პრემიერ-მინისტრ ბორის ჯონსონს კონსულტაციას უწევდა. პრემიერ-ლიგის გუნდს ხელმძღვანელობდა სამეფო იურისტი ადამ სმითი, რომელსაც თავისი თაობის ერთ-ერთ საუკეთესო სპორტულ ადვოკატად მიიჩნევენ. ის არაერთ საქმეში პრემიერ-ლიგას, ფეხბურთის ასოციაციასა და უეფას წარმოადგენდა.

პრემიერ-ლიგის ხარჯი, სავარაუდოდ, 70 მილიონ ფუნტს გადააჭარბებს. იურისტებმა გარდიანს განუცხადეს, რომ გამარჯვებულ მხარეს წაგებული მხარისგან იურიდიული ხარჯების დაახლოებით 70%-ის ანაზღაურება შეუძლია. შესაბამისად, ლიგამ რვაწლიანი და ჯერაც დაუსრულებელი საქმისთვის შესაძლოა თითქმის 50 მილიონი ფუნტის კომპენსაცია მიიღოს.

დამოუკიდებელმა კომისიამ 40-გვერდიან დოკუმენტში განმარტა, რატომ ცნო მანჩესტერ სიტი დამნაშავედ პრემიერ-ლიგის ფინანსური წესების მძიმე დარღვევასთან დაკავშირებულ ყველა ბრალდებაში. კლუბი ასევე დამნაშავედ ცნეს „ლიგის გამოძიებასთან თანამშრომლობაზე უარის თქმასთან დაკავშირებული ბრალდებების უმეტესობაში“.

პროცესის დასრულების შემდეგ კომისია კომპენსაციის ოდენობას განსაზღვრავს. მანჩესტერ სიტი თავს უდანაშაულოდ მიიჩნევს და განცხადებაში ამტკიცებს, რომ „უარყოფის შეუძლებელი მტკიცებულებების სრული ერთობლიობა არსებობს“. კლუბი გადაწყვეტილების გასაჩივრებას აპირებს. მან მას „მოსაზრება“ უწოდა, რომელიც „სამართლებრივ, პრინციპულ და ფაქტობრივ მკაფიო არსებით შეცდომებს შეიცავს და სანდო არ არის“. კლუბის აღმასრულებელმა დირექტორმა ფერან სორიანომ თანამშრომლებს სამწუთიანი ვიდეო გაუგზავნა და გადაწყვეტილებას „პრემიერ-ლიგის შეთქმულების თეორია“ უწოდა.

კომისია განსაზღვრავს, შეესაბამებოდა თუ არა პრემიერ-ლიგის იურიდიული ხარჯი საქმის მასშტაბს. 2024 წელს ევერტონი მოგებისა და მდგრადობის წესების დარღვევაში დამნაშავედ ცნეს. ლიგა ხარჯების დასაფარად 4,9 მილიონ ფუნტს ითხოვდა, თუმცა 1,7 მილიონი ფუნტი მიიღო. კლუბის იურისტებმა წარმატებით დაამტკიცეს, რომ იურიდიული ხარჯი ზედმეტად მაღალი იყო. ევერტონის იურისტები ამტკიცებდნენ, რომ პრემიერ-ლიგისთვის თითოეული გასაჯაროებული დოკუმენტის ღირებულება კლუბის მაჩვენებელზე 19-ჯერ მაღალი იყო. ერთი მოწმის ჩვენების მომზადების ღირებულება კი ხუთჯერ მეტი იყო.