მერცი: საქმე ევროპის სტაბილურობას ეხება

ფედერალურმა კანცლერმა ფრიდრიხ მერცმა უკრაინაში ვიზიტისას ქვეყანას დამატებითი დახმარება აღუთქვა. მან ამის მიზეზი ასე განმარტა: „ეს მთელი ევროპის პოლიტიკური სტაბილურობისთვის აუცილებელია. ამით ყველაზე მეტად სწორედ ჩვენ, გერმანელები უნდა ვიყოთ დაინტერესებული“.

მერცის თქმით, რუსეთი ომს მხოლოდ უკრაინის წინააღმდეგ კი არა, ევროპისა და გერმანიის წინააღმდეგაც აწარმოებს. მან განაცხადა: „4 აგვისტოს დრონებთან დაკავშირებული შემთხვევა ლაიფციგის აეროპორტზე შეიარაღებული თავდასხმა იყო, რომელიც მხოლოდ რუსეთიდან განხორციელდა“.

მერცის თქმით, დღევანდელმა ვიზიტმა მას კვლავ აჩვენა, რამდენად უაზრო და სასტიკია რუსეთის აგრესიული ომი. მან თქვა: „მშვიდობიან კვირა დღეს, უშუალოდ ჩემი ვიზიტის დროს, აქ, კიევში, ხიდს ბომბავენ, ერთი კვირით ადრე კი მეცნიერებათა აკადემიას დაესხნენ თავს“. მან რუსეთის მმართველ ვლადიმერ პუტინს ბრძოლის შეწყვეტისკენ კვლავ მოუწოდა.

ფედერალური კანცლერი დილით უკრაინის დედაქალაქში მატარებლით ჩავიდა.

მერცმა შუადღისას უკრაინისთვის „ძალიან კონკრეტული დახმარება“ გამოაცხადა. დაახლოებით ერთი მილიარდი ევროს სამხედრო დახმარება სწრაფი რუსული რეაქტიული დრონებისგან თავდაცვისთვის, სატელიტური ტექნოლოგიებისა და თავდაცვითი რაკეტებისთვის განკუთვნილ სახსრებს მოიცავს. კიდევ 350 მილიონი ევრო ინფრასტრუქტურისა და ენერგეტიკისთვისაა გათვალისწინებული.

დახმარებით გერმანულმა კომპანიებმაც უნდა ისარგებლონ. მერცს ამიტომაც ახლდნენ ეკონომიკის მინისტრი კატერინა რაიხე და მეწარმეთა დელეგაცია. მერცის თქმით, მხარეებმა საერთო ჯამში ექვს მილიარდ ევროზე მეტი ღირებულების შეთანხმებები დადეს.

უკრაინის მთავრობის ცნობით, უკრაინის თავდაცვის სამინისტრო კომპანია დილთან (Diehl) ათასობით Iris-T-ის თავდაცვითი რაკეტის მიწოდებაზე შეთანხმდა. კომპანია ჰენზოლდტთან (Hensoldt) სატელიტური ტექნოლოგიების შესახებ ხელშეკრულება დაიდო. კომპანია კვანტუმმა (Quantum) სწრაფი რუსული რეაქტიული დრონების გასანადგურებელი დრონები უნდა განავითაროს და აწარმოოს.

საუბარი ასევე ენერგეტიკული ინფრასტრუქტურის აღდგენას ეხება, რომელსაც რუსეთი ზამთრის წინ მიზანმიმართულად ანადგურებს. ამის გამო განსაკუთრებით მშვიდობიანი მოსახლეობა ზარალდება, რომელსაც გათბობისა და ელექტროენერგიის გარეშე უწევს ყოფნა. მერცმა აღნიშნა, რომ ეს ურთიერთსასარგებლო თანამშრომლობაა, რადგან გერმანიასაც შეუძლია უკრაინული გამოცდილებით ისარგებლოს.

მერცმა უკრაინაში შექმნილი ვითარებიდან საკუთარი მთავრობისთვისაც განსაზღვრა ამოცანა: „მთელი ევროპა გერმანიის სტაბილურობაზეა დამოკიდებული. შესაძლოა, გერმანიაში ბევრი ადამიანი ახლა სათანადოდ ვერ აფასებს, რამდენად მნიშვნელოვანია, რომ ამ არეულ პერიოდში სწორედ გერმანიას ჰყავდეს სტაბილური მთავრობა“.