ევროკავშირი უკრაინასთან მოლაპარაკებებისთვის ევროპულ გუნდზე შეთანხმდა

დიდხანს განიხილავდნენ, ვინ უნდა წარმოადგენდეს ევროპას რუსეთთან მოლაპარაკებებში უკრაინის წინააღმდეგ ომის დასრულების საკითხზე. ახლა შეთანხმება მიღწეულია: გუნდში ევროკავშირის ინსტიტუტებისა და ხუთი ქვეყნის წარმომადგენლები იქნებიან, მათ შორის გერმანიის.

თავდაპირველად ჩანდა, რომ უკრაინაში მშვიდობის დამყარების შესახებ მოლაპარაკებებში ევროპული მხარის წარმომადგენელზე შეთანხმება ვერ მოხერხდებოდა. ახლა ევროპის სახელმწიფოთა და მთავრობათა მეთაურები შეთანხმდნენ. დუბლინში ევროკავშირის არაფორმალური სამიტის შემდეგ ევროპული საბჭოს პრეზიდენტმა ანტონიო კოშტამ განაცხადა, რომ „ევროპული გუნდი უკრაინაში მშვიდობის შესახებ მოლაპარაკებებისთვის“ ევროკავშირის ინსტიტუტებისა და E5-ის წარმომადგენლებისგან შედგება.

ე.წ. E5-ის ქვეყნებია გერმანია, გაერთიანებული სამეფო, საფრანგეთი, იტალია და პოლონეთი. ევროკომისიის პრეზიდენტმა ურსულა ფონ დერ ლაიენმა განმარტა, რომ ევროკავშირის ინსტიტუტებში ევროკომისია და ევროკავშირის წევრი ქვეყნების საბჭო იგულისხმება. მან ხაზი გაუსვა: „ჩვენ უკრაინას მხარს დავუჭერთ და ჩვენს ინტერესებს დავიცავთ“.

თუმცა უცნობია, ვინ მიუჯდება მოლაპარაკების მაგიდას უმაღლეს დონეზე აშშ-ის პრეზიდენტ დონალდ ტრამპთან, კრემლის ლიდერ ვლადიმერ პუტინთან და უკრაინის პრეზიდენტ ვოლოდიმირ ზელენსკისთან საუბრისას.

კანცლერი ევროკავშირის ბიუჯეტს უკრაინის დახმარებას უკავშირებს და მიიჩნევს, რომ სამშვიდობო მოლაპარაკებებში გერმანიის მონაწილეობა გადაწყვეტილია.

კოშტას თქმით, ევროკავშირის პრინციპები და პოზიცია მოლაპარაკებებში ცნობილია, ხოლო ევროპული გუნდი კვლავ მჭიდრო კოორდინაციითა და სრული ერთიანობით იმოქმედებს. მან აღნიშნა, რომ ევროპამ „ყველა იმ მოლაპარაკებაში, რომელიც უკრაინის მომავალსა და ჩვენი კონტინენტის უსაფრთხოებას განსაზღვრავს, მკაფიო და ერთიანი ხმით უნდა ისაუბროს“. მისი თქმით, ევროკავშირი „ცენტრალურ როლს ასრულებს უკრაინის ევროპულ მომავალზე, მის აღდგენასა და კეთილდღეობაზე მოლაპარაკებებში“.

ევროპის წარმომადგენლობის საკითხის განხილვა ბოლო დროს გააქტიურდა, რადგან უკრაინასა და რუსეთს შორის აშშ-ის შუამავლობით მოლაპარაკებები მიმდინარეობს. პატარა წევრი ქვეყნები და ევროკავშირის ინსტიტუტები ევროკავშირის საგარეო საქმეთა და უსაფრთხოების პოლიტიკის უმაღლეს წარმომადგენელ კაია კალასს ან ევროპული საბჭოს პრეზიდენტ კოშტას უჭერდნენ მხარს. გერმანიისა და იტალიის მსგავსი წევრი ქვეყნები კი მოლაპარაკებებში საკუთარი წარმომადგენლების გაგზავნას აპირებდნენ. E5-ის ქვეყნების და ევროკავშირის ინსტიტუტების მონაწილეობაზე შეთანხმება, სავარაუდოდ, ამ ორი მოთხოვნის დაკმაყოფილების მცდელობაა.

აბუ-დაბიში მიმდინარე მოლაპარაკებები მხოლოდ უკრაინას აღარ ეხება, მიიჩნევს შტეფან ლააკი.