მოდრიჩი: 7:0-ში ყველაზე ცუდი წაგების ფორმა იყო

კაპიტან ლუკა მოდრიჩსაც არ სურდა ორი დღის წინ მომხდარის დავიწყება. მოდრიჩმა თქვა, რომ რიეკაში განცდილი მარცხის შემდეგ კარიერაში პირველად შერცხვა. მან აღნიშნა: „7:0-ში ყველაზე ცუდი წაგება კი არა, ის იყო, თუ როგორ წავაგეთ. ამით არ ვამაყობთ. მომხდარი ჩვენ ყველაზე მეტად გვტკივა. იმედი მაქვს, ხვალ ყველაფერი სრულიად განსხვავებული იქნება“.

მოდრიჩს გუნდის მოქმედების გახსენება კვლავ აშფოთებს. მან თქვა: „ერთიანობის, აგრესიულობისა და სიმტკიცის პრობლემა გვქონდა. იმ მატჩში ცუდად ერთმა ფეხბურთელმა კი არა, მთელმა გუნდმა ითამაშა. მსოფლიოს საუკეთესო გუნდთან, ესპანეთთან, ყველაფერი უნდა გამოვასწოროთ. აგრესიულად უნდა ვითამაშოთ და მეტოქეს ზედმეტი სივრცე არ დავუტოვოთ. თუ ბურთით ზედმეტ სივრცეს მივცემთ, გამოსავლის მოსაძებნად ბევრი დრო ექნებათ“.

კაპიტნის შეფასება მთავარი მწვრთნელის ანალიზს ძალიან ჰგავდა. მოდრიჩმა დასძინა: „ინგლისთან ძალიან პასიურები ვიყავით. თუ ბელინგემსა და კეინს დროს მისცემ, ისინი გამოსავალს იპოვიან. უნებლიეთ, მაგრამ სრული პასიურობა გამოვავლინეთ“.

ხორვატიის ნაკრები ქვეყანაში უმკაცრესი კრიტიკის ქვეშაა. მსოფლიოს ჩემპიონის მიღებამდე რამდენიმე საათით ადრე გუნდი ძალიან რთულ მდგომარეობაში აღმოჩნდა. სწორედ ასეთი გარემოებები აძლევს მოდრიჩს დამატებით სტიმულს. როდესაც ორშაბათს ნაკრებიდან შესაძლო წასვლაზე ჰკითხეს, მოდრიჩმა თქვა: „რა თქმა უნდა, რთულ მომენტებში აქ ყოფნა მსურს. ფეხბურთი მხოლოდ კარგი მოვლენები არ არის. ნაკრებში ყოველთვის სიამაყით ვთამაშობ. ყოველთვის, როცა აქ ვარ, ძალიან ვამაყობ. ჩემთვის ამ გუნდთან და ამ ახალგაზრდებთან ყოფნაზე დიდი ბედნიერება არ არსებობს. აქ ყოფნით ვტკბები და ბედნიერი ვარ. ჩემთვის ყველაზე მნიშვნელოვანი სწორედ ესაა, ვიყო იქ, სადაც ბედნიერი ვარ. ნაკრებში თამაში სრულად მავსებს“.

მოდრიჩმა თქვა: „ხვალ საკუთარი თავის რეაბილიტაციისა და იმის ჩვენების შესანიშნავი შესაძლებლობა გვაქვს, თუ რატომ აფასებს საფეხბურთო სამყარო ხორვატიას ასე მაღალ დონეზე. ხორვატია ესპანეთთან, ინგლისთან, ბრაზილიასა და არგენტინასთან მატჩებმა გამოარჩია. ასეთ შეხვედრებში საუკეთესო დონეს ვაჩვენებდით. ამიტომ აფასებენ ხორვატიას და უყვართ ის მთელ მსოფლიოში. ხვალ საკუთარი თავის რეაბილიტაციისა და შესანიშნავი მატჩის ჩატარების კარგი შესაძლებლობა გვაქვს. უპირველესად, ბოლო ორ შეხვედრაში ნაჩვენებისგან განსხვავებული სახე უნდა წარმოვაჩინოთ“.