ნიგერიამ სამხრეთ აფრიკაში ოფიციალური ვიზიტები შეაჩერა

ნიგერიის პარლამენტმა სამხრეთ აფრიკაში ოფიციალური ვიზიტები აკრძალა. ამ გადაწყვეტილებით მან იმიგრანტებზე, მათ შორის ნიგერიის მოქალაქეებზე, ძალადობა გააპროტესტა.

ქვედა პალატის პრესსპიკერმა აკინ როტიმიმ (Akin Rotimi) პარასკევს განცხადებაში თქვა: „ეროვნული ასამბლეის, მისი კომიტეტების, კანონმდებლების, ოფიციალური პირებისა და თანამშრომლების ყველა ოფიციალური ვიზიტი სამხრეთ აფრიკის რესპუბლიკაში ამიერიდან შეჩერებულია“.

აკრძალვა ვირტუალურ შეხვედრებსაც მოიცავს. მას წინ უძღოდა სამხრეთ აფრიკაში უცხოელთა წინააღმდეგ რამდენიმეთვიანი საპროტესტო აქციები, რომლებმაც ათიათასობით ადამიანი ქვეყნის დატოვება აიძულა.

როტიმიმ განაცხადა: „ეროვნული ასამბლეა საზღვარგარეთ მოქალაქეებზე მუდმივ თავდასხმებს უყურადღებოდ ვერ დატოვებს“.

ნიგერიის ეროვნული ასამბლეის მდივანმა კამორუ ოგუნლანამ (Kamoru Ogunlana) განცხადებაში აღნიშნა, რომ პარლამენტს განსაკუთრებით აშფოთებს ცნობები განმეორებადი ძალადობრივი თავდასხმების შესახებ. ამ ცნობების თანახმად, ნიგერიელები მოკლეს, დაჭრეს, იძულებით გადაადგილეს და აიძულეს, მიეტოვებინათ ბიზნესი, ინვესტიციები, სახლები და სხვა ქონება.

სამხრეთ აფრიკა, კონტინენტის ერთ-ერთი ყველაზე ინდუსტრიალიზებული ეკონომიკა, დიდი ხანია იზიდავს როგორც საბუთების არმქონე, ისე კანონიერი სტატუსის მქონე იმიგრანტებს.

თუმცა ქვეყანაში უმუშევრობისა და დანაშაულის დონე მაღალია, სოციალური მომსახურებები კი სუსტია. ანალიტიკოსების თქმით, მთავრობის ათწლეულების განმავლობაში ჩადენილი შეცდომების მიუხედავად, ამ პრობლემებზე პასუხისმგებლობას სულ უფრო ხშირად მიგრანტებს აკისრებენ.

ნიგერია ამ საკითხზე განსაკუთრებით აქტიურად საუბრობს და სამხრეთ აფრიკას ძალადობის შესაჩერებლად არასაკმარის ზომებში ადანაშაულებს.

გასულ კვირას დურბანში გამართული აქციის მონაწილეები კონგოელთა ბანაკში შეიჭრნენ, რასაც ძალადობრივი შეტაკებები მოჰყვა.

ზოგ შემთხვევაში, მომიტინგეები კარდაკარ დადიოდნენ, ადამიანებს სახლებიდან ძალით გამოჰყავდათ და იქვე მდგარ პოლიციის ფურგონებში სვამდნენ.

ძალადობის მსხვერპლთა შორის კანონიერი საბუთების მქონე ადამიანებიც აღმოჩნდნენ.

ივნისში სამხრეთ აფრიკაში მიგრანტების წინააღმდეგ ძალადობისას ორი ნიგერიელი მოკლეს. ეს უცხოელებისთვის ქვეყნის დასატოვებლად მომიტინგეების მიერ დაწესებულ არაოფიციალურ ვადამდე მხოლოდ ორი დღით ადრე მოხდა.

ნიგერიის საგარეო საქმეთა სამინისტრომ განაცხადა, რომ ერთი მათგანი, სავარაუდოდ, პოლიციელებმა მოკლეს, მეორე კი დაუდგენელმა თავდამსხმელებმა.