Nvidia Brev-ის უსაფრთხოების დარღვევისას შესაძლოა მომხმარებელთა ვირტუალურ მანქანებზე წვდომის SSH გასაღებები გამჟღავნდა

ჰაკერებმა Nvidia-ს კიდევ ერთხელ შეუტიეს, ამჯერად მისი Brev-ის ღრუბლოვანი განვითარების პლატფორმა გახდნენ სამიზნე. მომხმარებლების ცნობით, არასანქცირებული აქტივობა 4 ოქტომბრიდან 20 ოქტომბრამდე მიმდინარეობდა. დაზარალებული მომხმარებლებისთვის გაგზავნილი შეტყობინების თანახმად, შესაძლოა, ზოგიერთი ანგარიში გამჟღავნდა. კომპანიამ განაცხადა, რომ ინციდენტი გამოიძია და პლატფორმაზე უცნობი აქტივობა გამოავლინა. კომპანიამ დასძინა, რომ პლატფორმაზე შენახული ინფორმაცია შესაძლოა ბოროტმოქმედებს ხელში ჩავარდნოდათ. ამ ინფორმაციაში შედიოდა Brev-ის მიერ შექმნილი SSH გასაღებების ნაკრები.

კომპანიამ უკვე შეცვალა დაზარალებული SSH გასაღებები და მომხმარებელთა მანქანები ახალი გასაღებებით განაახლა, თუმცა, მისი თქმით, გასაღებების არასათანადოდ გამოყენების მტკიცებულება ვერ იპოვა. შეტყობინებაში ნათქვამია: „გწერთ, რათა გაცნობოთ, რომ Nvidia Corporation-ს უსაფრთხოების ინციდენტი შეემთხვა, რომელსაც შესაძლოა თქვენი მონაცემების უსაფრთხოებაზე ემოქმედა. ჩვენმა ანალიზმა აჩვენა, რომ შესაძლოა დაზიანებულიყო თქვენი ინფორმაცია Brev-ის ქსელში. ეს SSH გასაღები უკვე შეიცვალა, ხოლო თქვენი ინსტანციები ახალი გასაღებით განახლდა“.

თუმცა კომპანიას არ განუმარტავს, როგორ მოიპოვეს თავდამსხმელებმა წვდომა ან სცადა თუ არა ვინმემ მოპარული მონაცემების გამოყენება. კომპანიას არც ის გაუმჟღავნებია, მოიპოვეს თუ არა წვდომა მომხმარებელთა მონაცემებზე ან სამუშაო დატვირთვებზე. SSH პროტოკოლი გამოიყენება „ვირტუალურ მანქანებს“, ანუ ერთმანეთთან დაკავშირებულ დისტანციურ კომპიუტერებს შორის უსაფრთხო კავშირის დასამყარებლად. დეველოპერებსა და სისტემურ ადმინისტრატორებს მისი მეშვეობით შეუძლიათ დისტანციური სერვერების მართვა, ფაილების გადაცემა და ბრძანებების შესრულება, მანქანასთან ფიზიკური წვდომის გარეშე. ეს AnyDesk-ის ან TeamViewer-ის მსგავსია, ოღონდ დეველოპერებისთვის. Brev SSH გასაღებებს იყენებს, რათა მომხმარებლებმა ღრუბლოვან გარემოში ამ სერვისებზე წვდომა მიიღონ. ამიტომ, თუ თავდამსხმელები ამ გასაღებებს მოიპოვებენ, მათ შესაძლოა ვირტუალური მანქანის ხელში ჩაგდება შეძლონ, კონკრეტული უფლებებისა და უსაფრთხოების სხვა ზომების მიხედვით.

ინციდენტი იმ დროს მოხდა, როცა ხელოვნური ინტელექტის განვითარების სერვისებისა და ღრუბლოვანი ინფრასტრუქტურის მასპინძელი რამდენიმე კომპანია მომხმარებელთა მონაცემების გამჟღავნებასთან დაკავშირებულ უსაფრთხოების მზარდ პრობლემებს ებრძვის. 30 ოქტომბერს კიბერუსაფრთხოების კომპანია Wiz-მა ხელოვნური ინტელექტის დეველოპერთა პლატფორმებზე მომხდარ ინციდენტებს ბლოგპოსტი მიუძღვნა და მას „შავი ოქტომბერი“ უწოდა. კომპანიამ თვის განმავლობაში უსაფრთხოების ინციდენტების მქონე სულ მცირე ცხრა პლატფორმა გამოავლინა, მათ შორის Zeabur, Fireworks AI, Lightning AI, Opencode, Warp და Northflank. კომპანიის ცნობით, ინციდენტები განმეორებადი იყო. მკვლევრებმა აღნიშნეს, რომ „ყველა საჯარო ანგარიში მიზანმიმართულ ექსპლუატაციაზე მიუთითებს. თავდამსხმელები პირდაპირ ეძებენ შენახულ გარემოს ცვლადებს, განსაკუთრებით მათ, რომლებსაც ხელოვნურ ინტელექტზე წვდომა აქვთ“.