OpenAI-ისა და Anthropic-ის ხელმძღვანელები AI-ზე გლობალურ კონტროლს ითხოვენ

ხელოვნურ ინტელექტსა და საერთაშორისო უსაფრთხოებაზე უშიშროების საბჭოს სხდომაზე OpenAI-ის აღმასრულებელმა დირექტორმა სემ ალტმანმა განაცხადა: „ჩვენ არჩევანის წინაშე ვდგავართ. ხელოვნური ინტელექტი შეიძლება შემოქმედებისა და აღმოჩენების ახალ აღორძინებას დაემსგავსოს, ან რყევებითა და ქაოსით გამორჩეულ ახალ ინდუსტრიულ რევოლუციას“.

ალტმანმა თქვა: „ხელოვნური ინტელექტი ადამიანებისთვის უნდა შეიქმნას და არა მხოლოდ იმისთვის, რომ მანქანებმა საკუთარი მიზნებისთვის უფრო სწრაფად იმუშაონ“. მან დასძინა, რომ ტექნოლოგიაზე მომუშავე ადამიანების ზოგიერთი განცხადება „იმდენად დისტოპიურია, რომ ცუდი სამეცნიერო ფანტასტიკის ფილმების სიუჟეტს ჰგავს“.

ალტმანმა გააფრთხილა: „არც ერთ ადამიანს, კომპანიას ან ქვეყანას არ უნდა შეეძლოს, ხელოვნური ინტელექტის უძლიერესი მოდელებით საკუთარი მსოფლმხედველობა ყველა დანარჩენს მოახვიოს“. მისი თქმით, ხელოვნურ ინტელექტთან დაკავშირებულ გადაწყვეტილებებს „მხოლოდ სან-ფრანცისკოს ლაბორატორიები ვერ მიიღებენ“. ისინი „დემოკრატიული პროცესებითა და იმ მთავრობების მონაწილეობით უნდა ჩამოყალიბდეს, რომლებიც ხალხის წინაშე ანგარიშვალდებული არიან“.

Anthropic-ის აღმასრულებელმა დირექტორმა დარიო ამოდეიმ ორი მთავარი რისკი გამოყო. ერთია ხელოვნური ინტელექტის მოდელების ბოროტად გამოყენება, მათ შორის, „ბიოტერორისტების მიერ ბიოლოგიური იარაღის შესაქმნელად“. მეორე საფრთხეა „მოდელების შესაძლებლობების იმაზე სწრაფად განვითარება, ვიდრე დეველოპერები მათ გაკონტროლებას შეძლებენ“.

ამოდეიმ აღნიშნა: „თუ ხელოვნურ ინტელექტს ცუდად ვმართავთ, მან შეიძლება მთლიანად კაცობრიობას საფრთხე შეუქმნას“.

ამოდეიმ თქვა, რომ მისი კომპანია „იმდენად შეანელებს მუშაობას, რამდენადაც საჭირო იქნება“, რათა თითოეული ახალი ხელოვნური ინტელექტის სისტემა უსაფრთხო იყოს. თუმცა, მან ხაზი გაუსვა, რომ რისკების მართვა „ნებისმიერი ერთი კომპანიის შესაძლებლობებს აღემატება“ და „მთელ ინდუსტრიასა და მსოფლიოს მოიცავს“.

ამოდეიმ „კონტროლის დაკარგვისა და ბოროტად გამოყენების რისკებზე ხელოვნური ინტელექტის მოდელების შესამოწმებელი საერთო გლობალური სტანდარტების“ შექმნისკენ მოუწოდა. მან ეს საკითხი „დღეს მსოფლიოს წინაშე მდგარ ყველაზე მნიშვნელოვან გლობალურ უსაფრთხოების საკითხად“ აღწერა.

ხელოვნური ინტელექტის საკითხებზე გაეროს საერთაშორისო დამოუკიდებელი პანელის თანათავმჯდომარე იოშუა ბენჯიო არ დაეთანხმა ინდუსტრიის მოსაზრებას, რომ ხელოვნური ინტელექტის განვითარება გარდაუვალი შეჯიბრია.

ბენჯიომ განაცხადა: „მოქალაქეებმა და მთავრობებმა არ უნდა მიიღონ კომპანიების მტკიცება, რომ ისინი შეჯიბრში არიან ჩათრეული“. მან დასძინა: „ეს შეჯიბრი ბუნების კანონი არ არის. ის არჩევანის შედეგია, რომელიც თავად კომპანიებმა გააკეთეს“.