პეკინმა სი ძინპინის აშშ-ში ვიზიტი დაადასტურა

ჩინეთის პრეზიდენტი სი ძინპინი 23 სექტემბრიდან, ოთხშაბათიდან, 25 სექტემბრამდე, პარასკევამდე, აშშ-ში ვიზიტით ჩავა. ვიზიტისას ის პრეზიდენტ დონალდ ტრამპთან მოლაპარაკებებს გამართავს.

პეკინმა ეს ინფორმაცია დღეს ოფიციალური განცხადებით დაადასტურა, თუმცა პროგრამის შესახებ დამატებითი დეტალები არ გაავრცელა.

სი ძინპინისა და ტრამპის სამიტი 24 სექტემბერს, ხუთშაბათს, ვაშინგტონში გაიმართება. ეს წელს ორი ლიდერის მეორე შეხვედრა იქნება. პირველი მაისში შედგა, როცა აშშ-ის პრეზიდენტი ჩინეთს ეწვია.

შეხვედრამდე ერთი დღით ადრე ნიუ-იორკში ეკონომიკური და სავაჭრო კონსულტაციები გაიმართა. მას ჩინეთის ვიცე-პრემიერი ჰე ლიფენგი, აშშ-ის ფინანსთა მინისტრი სკოტ ბესენტი და სავაჭრო წარმომადგენელი ჯეიმისონ გრირი ესწრებოდნენ. პეკინის ცნობით, მხარეებმა ეკონომიკურ და სავაჭრო საკითხებზე „გულწრფელი, საფუძვლიანი და კონსტრუქციული“ მოსაზრებები გაცვალეს. მათ ხელოვნური ინტელექტიც განიხილეს.

სამიტზე სავარაუდოდ ვაჭრობასა და ტარიფებს, ტექნოლოგიურ შეზღუდვებს, ხელოვნურ ინტელექტსა და კრიტიკულ მინერალებს განიხილავენ. მოლაპარაკებების დღის წესრიგში შესაძლოა ტაივანი და ირანთან ომიც მოხვდეს.

ვიზიტი მაისში, პეკინის სამიტზე შეთანხმდა. შეხვედრის დასრულების შემდეგ ორივე მხარემ განაცხადა, რომ სი ძინპინი შემოდგომაზე აშშ-ში სახელმწიფო ვიზიტით ჩავიდოდა.