უკრაინაში კორუფციული ქსელები უშიშროებისა და პოლიციის სტრუქტურებშიც

უკრაინის ანტიკორუფციული უწყებების გამოძიება ამჯერად, უპირველესად, ქვეყნის შიდა უშიშროების სამსახურის, სბუ-ს, წინააღმდეგ არის მიმართული. ინტერნეტგამოცემა „უკრაინსკა პრავდას“ საგამოძიებო ჟურნალისტმა, მიხაილო ტკაჩმა, განაცხადა, რომ ბრალდებები შოკისმომგვრელია. მისი თქმით, შესაძლოა, სბუ-ს დაეფარა ყველაფერი, რასაც თავად უნდა ებრძოლა, მათ შორის უკანონო საქმიანობა.

სბუ-ს მაღალი თანამდებობის პირი უკვე დააკავეს, 70-ზე მეტი ჩხრეკა ჩატარდა. ანტიკორუფციული უწყებების, ნაბუსა და საპოს, მიერ გამოქვეყნებული მასალები წინა გამოძიებების გაგრძელებაა. მათ „კართაგონი“ უწოდეს. რამდენიმე თვის წინ უწყებებმა უკვე გამოავლინეს, რომ გენერალური პროკურატურა ე.წ. ქოლცენტრებთან თანამშრომლობდა. ეს კომპანიები ფინანსურ თაღლითობას ქვეყნის შიგნითაც და მის ფარგლებს გარეთაც ეწეოდნენ.

უკრაინაში უწყებები გენერალური პროკურატურის თანამშრომლების წინააღმდეგ მოქმედებენ. მონაწილეობდნენ ისინი თაღლითობაში? მეტი

ახლა, ერთი მხრივ, ახალია ის, რომ სბუ-სა და პოლიციასაც, სავარაუდოდ, კრიმინალური კომპანიები მფარველობაში ჰყავდათ. მეორე მხრივ, სახელმწიფო უწყებები, როგორც ჩანს, სხვა კრიმინალურ ჯგუფებსაც იცავდნენ, მათ შორის ნარკოკარტელსა და ფულის გამყალბებლებს. საუბარია გამოძალვაზეც.

ანტიკორუფციულმა აქტივისტმა მარტინა ბოგუსლავეცმა ტელეარხ „ესპრესოს“ ეთერში ყურადღება გაამახვილა საიდუმლო აუდიოჩანაწერებზე, რომლებიც ნაბუმ და საპომ გამოაქვეყნეს. ბოგუსლავეცის თქმით, ჩანაწერში ისმის, რომ განიხილავდნენ საგამოძიებო ჟურნალისტ დენის ბიგუსის მკვლელობას ან მისთვის სახეზე მჟავის გადასხმას. საბოლოოდ, საქმე მაფიურ სტრუქტურებს ეხება, რომლებიც სახელმწიფოს შიგნითაც აღწევდნენ, აღნიშნა ბოგუსლავეცმა.

უკრაინის პრეზიდენტ ვოლოდიმირ ზელენსკის გარემოცვასთან დაკავშირებული ახალი კორუფციული სკანდალი კიდევ უფრო ფართოვდება. მეტი

გამოქვეყნებული დოკუმენტები პრეზიდენტ ვოლოდიმირ ზელენსკის ადმინისტრაციასთან კავშირს არ აჩვენებს. მიუხედავად ამისა, ჟურნალისტ მიხაილო ტკაჩის აზრით, ზელენსკის ამაზე პოლიტიკური პასუხისმგებლობა ეკისრება.