პარაგვაის პრეზიდენტი სანტიაგო პენია ბანკის კრიზისის ფონზე გადადგა

პარაგვაის პრეზიდენტი სანტიაგო პენია ხუთშაბათს გადადგა, მას შემდეგ, რაც ციფრული კრედიტორის, „უენოს“ (Ueno), ჩამოშლის გამო ზეწოლა გაიზარდა. ამ დროს კანონმდებლები მის თანამდებობიდან გადაყენებას განიხილავდნენ.

ბანკის ანგარიშები, რომლებითაც საპენსიო თანხების გადარიცხვაც ხდებოდა, გაყინულია. მილიონობით მომხმარებელი საკუთარ ფულს ვერ იღებს. „უენოს“ ასობით მილიონი დოლარის საჯარო სახსრებიც ჰქონდა.

პენიას გადადგომას წინ უძღოდა კონგრესის თავმჯდომარე ბასილიო ნუნიესისა და მმართველი კონსერვატიული „კოლორადოს პარტიის“ ლიდერის, ორასიო კარტესის, მიერ მხარდაჭერის შეწყვეტა.

ოპოზიციის 35-მა დეპუტატმა და მმართველი პარტიის განდგომილმა წევრებმა 80-ადგილიან დეპუტატთა პალატაში იმპიჩმენტის საკითხის დაყენების დოკუმენტები წარადგინეს. ისინი პენიას ინტერესთა კონფლიქტში, საპენსიო სახსრების ბოროტად გამოყენებასა და „უენოსთან“ დაკავშირებული ფაქტების ინსტიტუციურ მიჩქმალვაში ადანაშაულებდნენ.

პენიამ „უენო ჰოლდინგში“ (Ueno Holding) თავისი წილები 2025 წლის აპრილში გაყიდა. ჰოლდინგის საქმიანობაში ბანკიც შედის. დეპუტატებმა შესაძლო არასათანადო ფინანსური სარგებლის ბრალდების საფუძვლად „უენოსგან“ მიღებული ორი სესხიც დაასახელეს.

მათ პენიას სოციალური უზრუნველყოფის ინსტიტუტში, რომელსაც IPS-ს უწოდებენ, არასათანადო ჩარევა და „უენოს“ მიმართ უპირატესი მოპყრობა დასდეს ბრალად. IPS პარაგვაელი მშრომელების უმეტესობის საპენსიო და ჯანდაცვის ფონდებს მართავს. ფინანსური მენეჯერის, გლადის ვერას, თქმით, ბანკში ინსტიტუტის 355 მილიონი დოლარი ინახებოდა, რაც მისი ინვესტიციების დაახლოებით 9%-ს შეადგენდა.

წარდგენილ დოკუმენტში ასევე ეჭვქვეშ დააყენეს პენიას 2023 წლის გადაწყვეტილება, ცენტრალური ბანკის ხელმძღვანელად კარლოს კარვალიო დაენიშნა, რომელიც მანამდე „ფინანსიერა უენოს“ (Financiera Ueno) თავმჯდომარე იყო. დოკუმენტის თანახმად, ცენტრალურმა ბანკმა კომპანიის ბანკად გარდაქმნა მისი დანიშვნიდან მხოლოდ 83 დღეში დაამტკიცა.

„უენოს“ დაახლოებით 2,94 მილიონი მომხმარებელი ჰყავდა, რაც პარაგვაის ზრდასრული მოსახლეობის დაახლოებით 60%-ია.

ბანკის ცნობით, გასული თვის მდგომარეობით, მას საჯარო სექტორის დეპოზიტების სახით დაახლოებით 800 მილიონი დოლარი ჰქონდა, რაც მთლიანი დეპოზიტების დაახლოებით მეოთხედს შეადგენდა. მათ შორის იყო პარაგვაის დიდი ჰიდროელექტროსადგურების ოპერატორების თანხებიც.

პარაგვაის ცენტრალურმა ბანკმა სამშაბათს „უენოს“ გაჯანსაღების ან დახურვის პროცესი დაიწყო მას შემდეგ, რაც დაადგინა, რომ ბანკის გადახდისუნარიანობის კოეფიციენტი სავალდებულო მინიმუმის ნახევარზე ნაკლები იყო.