პოლონეთი კიევი-ვარშავის მატარებელზე თავდასხმამ შეაშფოთა

რუსეთის მიერ კიევიდან ვარშავისკენ მიმავალ მატარებელსა და პოლონეთის მოსაზღვრე უკრაინულ რეგიონზე თავდასხმის შემდეგ, პოლონეთის მთავრობამ მოსკოვი კონფლიქტის გამწვავებაში დაადანაშაულა. პოლონეთის პრემიერ-მინისტრმა დონალდ ტუსკმა კრიზისული შტაბის სხდომაზე განაცხადა: „რუსეთის მხრიდან ესკალაცია ახლა რეალობად იქცა და ამის მაგალითები სულ უფრო უახლოვდება ჩვენს საზღვარს“. დასავლელი პოლიტიკოსებიც კიევში მგზავრობისას პოლონეთსა და უკრაინას შორის სარკინიგზო კავშირს იყენებენ, რადგან ქვეყნის საჰაერო სივრცე დაკეტილია.

უკრაინის რკინიგზის ცნობით, კვირას სასაზღვრო სადგურ იაჰოდინთან კიევი-ვარშავის სამგზავრო მატარებლის ლოკომოტივს თავს დაესხნენ. მგზავრების ევაკუაცია დროულად განხორციელდა და არავინ დაშავებულა. პოლონეთის რკინიგზის კომპანია PKP-მ საღამოს განაცხადა, რომ მატარებელი ვარშავაში ექვსი საათის დაგვიანებით ჩავიდა.

საჰაერო თავდასხმების საფრთხის გამო, პოლონეთის მხარეს ორმა სასაზღვრო გამშვებმა პუნქტმა მუშაობა დროებით შეაჩერა. სასაზღვრო სამსახურის უფროსმა ვარშავაში, კრიზისული შტაბის სხდომაზე განაცხადა, რომ გამთენიისას დრონი დოროჰუსკის გამშვები პუნქტიდან დაახლოებით ორი კილომეტრის მოშორებით მდებარე ბენზინგასამართ სადგურს თავს დაესხა. გამშვები პუნქტის ტერიტორიიდან დაახლოებით 280 მგზავრის ევაკუაცია განხორციელდა. მესაზღვრეებმა და მებაჟეებმა თავშესაფარს შეაფარეს თავი.

მოგვიანებით კიდევ ერთი დრონი ჰრებენეს გამშვებ პუნქტს მიუახლოვდა. იქაც 300-ზე მეტი ადამიანი უსაფრთხო ადგილას გადაიყვანეს. თუმცა საბოლოოდ მიმდებარე ტერიტორიაზე თავდასხმა არ მომხდარა. გავრცელებული ცნობით, შუადღის შემდეგ საზღვარზე ვითარება ნორმალიზდა.

ტუსკმა აღნიშნა, რომ რუსეთი წარსულში მოლდოვის სასაზღვრო გამშვები პუნქტების პარალიზებასაც ცდილობდა. მისი თქმით, მოკავშირეებმა მანამდე გააფრთხილეს, რომ რუსეთის გეგმა უკრაინის სასაზღვრო გამშვები პუნქტების მუშაობის მოშლისა და, შესაძლოა, მათი განადგურების მცდელობებსაც ითვალისწინებდა. ეს პოლონეთსაც შეიძლება შეეხოს.

ტუსკმა დასძინა, რომ მომდევნო კვირებსა და თვეებში რუსეთის გაძლიერებული მოქმედებებია მოსალოდნელი. მან განაცხადა: „ვერ გამოვრიცხავთ, რომ ეს ესკალაცია ჩვენს ტერიტორიასაც შეეხება“. პრემიერ-მინისტრმა ასევე გააფრთხილა, რომ რუსეთი პოლონეთის წინააღმდეგ რეაქტიული ძრავით აღჭურვილი დრონების გამოსაყენებლადაც მზადაა.

უკრაინის პრეზიდენტმა ვოლოდიმირ ზელენსკიმ დაწერა, რომ მოსკოვის თავდასხმების შედეგად, პოლონეთ-უკრაინის საზღვართან, ვოლინის რეგიონში ლოკომოტივს ცეცხლი გაუჩნდა და ბენზინგასამართი სადგური დაზიანდა.

უკრაინის საგარეო საქმეთა მინისტრმა ანდრი სიბიჰამ მოსკოვისთვის უფრო მკაცრი შედეგები მოითხოვა. მან X-ზე დაწერა, რომ პოლონეთ-უკრაინის საზღვართან რუსეთის თავდასხმები უკრაინის სახელმწიფო საზღვრებზე შეტევების უბრალო გაგრძელება არ არის. სიბიჰამ დაწერა: „ეს პუტინის ტერორია, რომელიც პირდაპირ ევროკავშირისა და ნატოს კარზე აკაკუნებს“.