პუტინმა კიდევ ხუთი ევროპული კომპანიის აქტივები ჩამოართვა

აქტივები 2026 წლის თებერვალში რეგისტრირებული მმართველი კომპანიის, Centre Capital-ის, დროებით მართვაში გადავიდა.

კომპანიის აღმასრულებელ დირექტორად მარატ მირხაიდაროვია მითითებული. ის ზაბაიკალსკის მხარის გუბერნატორის ადმინისტრაციას ხელმძღვანელობდა და თანამდებობა 2025 წელს დატოვა. მან დაზიანება უკრაინაში რუსეთის მიმდინარე ომში მიიღო.

განკარგულება ასევე მოიცავს ქაღალდის შეფუთვის მწარმოებელ Kappa Rus-ს, რომელიც ადრე ირლანდიურ Smurfit Kappa-ს ეკუთვნოდა, და ჰიგიენური პროდუქტების მწარმოებელ Ontex RU-ს, რომელიც ბელგიური Ontex-ის ჯგუფის ნაწილია. სიაში ასევე მოხვდნენ ლითონის შეფუთვის მწარმოებელი Eviosys Packaging Kuban, რომელიც აშშ-ში დაფუძნებული Sonoco Products Company-ს ნაწილია, და Menshen Packaging CIS, რომელსაც გერმანული პლასტმასის მწარმოებელი Menshen ფლობს.

ხუთივე კომპანია რუსეთში მუშაობას 2022 წლის თებერვალში უკრაინაში რუსეთის სრულმასშტაბიანი შეჭრის შემდეგაც აგრძელებდა.

Tarkett-ს, რომელიც იატაკის საფარის გაყიდვებით მსოფლიოში მესამე ადგილზეა, რუსეთის ტერიტორიაზე ორი ქარხანა დარჩა. კომპანიას მსოფლიოს მასშტაბით 34 საწარმოო ობიექტი აქვს. 2024 წლის წლიური ანგარიშის თანახმად, Tarkett-ი ვინილის იატაკის საფარის ბაზრის ლიდერია. კომპანია რუსეთის ბიუჯეტში გადასახადების გადახდასაც აგრძელებდა.

ამ ჩამორთმევებს სექტემბერში მიღებული მსგავსი ზომები უძღოდა წინ. მაშინ პუტინმა შვეიცარიული კვების გიგანტ Nestlé-ს, გერმანული ჰიპერმარკეტების ქსელ Metro-ს, ფრანგული სავაჭრო ქსელ Auchan-სა და სახლის კეთილმოწყობის ქსელ Leroy Merlin-ს რუსული აქტივები დროებით მართვაში გადასცა.

ეს აქტივები კომპანია LEV Management-ს გადაეცა, რომელიც გადაწყვეტილებამდე ცოტა ხნით ადრე შეიქმნა. რუსული მედიის ცნობით, კომპანიას რუსეთის უსაფრთხოების სამსახურებთან კავშირები აქვს. მალევე დროებით მართვაში გადავიდა პლასტმასის დოზირების სისტემების მწარმოებელიც, რომელსაც ფრანგული ჰოლდინგი Aptar Europe Holding ფლობს.

2023 წლის აპრილში ხელმოწერილი პრეზიდენტის განკარგულებით, მსგავსი ჩამორთმევის მექანიზმი შეიქმნა. ის უცხოური კომპანიების გარკვეულ რუსულ აქტივებზე დროებითი მართვის დაწესებას უშვებს.

დასავლეთის მთავრობებმა და საერთაშორისო სამართლის ექსპერტებმა ეს ნაბიჯი უკანონო ექსპროპრიაციად შეაფასეს. კომპანიებს, რომელთა აქტივებსაც ჩამოართმევენ, პრინციპში, კომპენსაციის მოთხოვნა საერთაშორისო არბიტრაჟში შეუძლიათ. ამის საფუძველი რუსეთსა და ევროკავშირის წევრ სახელმწიფოებს შორის გაფორმებული ორმხრივი საინვესტიციო ხელშეკრულებებია. თუმცა კრემლისა და მასთან დაკავშირებული სუბიექტების წინააღმდეგ გადაწყვეტილებების აღსრულება თითქმის შეუძლებელია.