რუსეთი უკრაინაზე თავდასხმების გაგრძელებას აპირებს

რუსეთი უკრაინაზე თავდასხმების გაგრძელებას აპირებს, მიუხედავად იმისა, რომ აშშ-ის შუამავლობით მოლაპარაკებების განახლება იგეგმება. ამის შესახებ კრემლის პრესსპიკერმა პესკოვმა განაცხადა. ხარკოვში რუსეთის თავდასხმას ორი ადამიანი ემსხვერპლა.

რუსეთი უკრაინაზე თავდასხმების გაგრძელებას აპირებს, მიუხედავად აშშ-ის შუამავლობით დაგეგმილი მოლაპარაკებებისა. კრემლის პრესსპიკერმა დმიტრი პესკოვმა განაცხადა: „სამმხრივი მოლაპარაკებების განახლების შესახებ გადაწყვეტილება სამხედრო მოქმედებებს შეზღუდვებს არ უწესებს“. მისი თქმით, რუსეთის შეიარაღებული ძალები უკრაინის სამხედრო-სამრეწველო კომპლექსზე მასშტაბურ თავდასხმებს გააგრძელებენ.

პესკოვის თქმით, რუსეთი შესაძლოა, კვლავ დათანხმდეს ადგილობრივად შეზღუდულ ცეცხლის შეწყვეტას ჰუმანიტარული მიზნებისთვის, როგორც ეს ბოლოს ოლეშკიში მოხდა. რუსეთის მიერ ოკუპირებულ სამხრეთუკრაინულ ქალაქში დროებითი ზავი სამშაბათს უნდა ამოქმედდეს.

მოსკოვი კვლავ მოითხოვს აღმოსავლეთ უკრაინაში ტერიტორიების დათმობას, ასევე კიევისთვის სამხედრო და პოლიტიკური შეზღუდვების დაწესებას. უკრაინა და მისი მოკავშირეები ამ მოთხოვნებს ისეთ პირობებად მიიჩნევენ, რომლებიც ფაქტობრივად კაპიტულაციას უტოლდება.

ფრონტისპირა ქალაქ ოლეშკიში ჰუმანიტარული ვითარება მძიმეა. ახლა მოსახლეობის ევაკუაციის იმედი გაჩნდა.

ორშაბათსაც რუსეთის თავდასხმების შედეგად უკრაინაში რამდენიმე ადამიანი დაიღუპა ან დაშავდა. საღამოს რუსეთის სარაკეტო დარტყმას კიევში სულ მცირე ერთი ადამიანი ემსხვერპლა. კიევის მერმა ვიტალი კლიჩკომ ტელეგრამზე დაწერა, რომ ათი ადამიანი დაშავდა. მისი თქმით, თავდასხმების შედეგად, მათ შორის, ორი სამედიცინო დაწესებულება და სტუდენტური საერთო საცხოვრებელი დაზიანდა. უკრაინის საჰაერო თავდაცვის ძალების ცნობით, თავდასხმებისას ბალისტიკური რაკეტები გამოიყენეს.

მანამდე, უკრაინის ოფიციალური პირების ცნობით, აღმოსავლეთ უკრაინის დიდ ქალაქ ხარკოვზე რუსეთის თავდასხმას სულ მცირე ორი ადამიანი ემსხვერპლა. ხარკოვის მერმა იგორ ტერეხოვმა განაცხადა, რომ სულ მცირე ოთხი ადამიანი დაშავდა. დაზიანდა კერძო და მრავალბინიანი სახლები, ასევე ავტომობილები. მაშველები საღამოსაც მუშაობდნენ.

შაბათს საღამოს ხარკოვში სამშენებლო მასალების მაღაზიას რუსეთის რამდენიმე ჭურვი მოხვდა. უკრაინის ცნობით, არავინ დაშავებულა. წინა დღეს რუსეთის თავდასხმის შედეგად, ხარკოვის მიმდებარე რეგიონში სულ მცირე შვიდი ადამიანი დაშავდა. ხარკოვი უკრაინის სიდიდით მეორე ქალაქია და ფრონტის სიახლოვის გამო მას რეგულარულად ესხმიან თავს.

რუსეთმა ღამით უკრაინის დედაქალაქ კიევს კვლავ დაუშინა რაკეტები. რამდენიმე ადამიანი დაშავდა.