რუსეთმა სირიაში სამხედრო ბაზების მომარაგება განაახლა

სირიის განცხადებით, რუსული ბაზების მომავალზე მოსკოვთან შეთანხმება შედგა

რუსულმა კოლონამ სირიის ტარტუსის პორტში მარაგი ჩაიტანა. ეს პირველი შემთხვევაა მას შემდეგ, რაც აგვისტოში მოსკოვსა და დამასკოს შორის შეთანხმება გაფორმდა.

ოთხი გემისგან შემდგარი კოლონა პორტში 7 სექტემბერს შევიდა. ეს მიუთითებს, რომ ახალი შეთანხმების საფუძველზე მოსკოვი დასავლეთ სირიაში, ტარტუსის პორტსა და ჰმეიმიმის ავიაბაზაზე მდებარე ობიექტების მომარაგებას განაგრძობს.

სირიამ აგვისტოს დასაწყისში გამოაცხადა, რომ 18-თვიანი მოლაპარაკებების შემდეგ ურთიერთგაგების მემორანდუმზე შეთანხმება შედგა.

სირიის საგარეო საქმეთა სამინისტროს ცნობით, შეთანხმება ორივე ობიექტს „ერთობლივ სასწავლო და შესაძლებლობების განვითარების ცენტრებად“ გარდაქმნის. ეს ობიექტები დიდი ხნის განმავლობაში ხმელთაშუა ზღვასა და ახლო აღმოსავლეთში მოსკოვის მთავარ სამხედრო საყრდენებს წარმოადგენდა. სამოქალაქო საქმიანობაზე კონტროლს სირია გადაიბარებს. რუსეთის პრეზიდენტი ვლადიმერ პუტინი და მისი სირიელი კოლეგა აჰმედ ალ-შარა ბაზების მომავალზე მოლაპარაკებებს განაგრძობენ.

როიტერსის (Reuters) მიერ გადამოწმებულ სატელიტურ სურათებზე სატვირთო გემი „სპარტა“ ტარტუსში, სამხედრო-საზღვაო ძალების მომმარაგებელ ნავთობმზიდ „აკადემიკ პაშინთან“ ერთად იდგა. რუსული ტანკერი „გენერალ სკობელევი“ ნაპირიდან მოშორებით დარჩა. „სპარტა“ სირიაში რუსეთის სამხედრო ლოჯისტიკას დიდი ხანია ემსახურება. დასავლეთის სანქციები მასზეც და ტანკერზეც ვრცელდება.

სირიის 13-წლიანი სამოქალაქო ომის დროს მოსკოვი ყოფილი პრეზიდენტის, ბაშარ ალ-ასადის, ხელისუფლებაში შესანარჩუნებლად სამხედრო ძალით ჩაერია. 2024 წელს ალ-ასადის ჩამოშორებამ ახლო აღმოსავლეთში მოსკოვის გავლენა მკვეთრად შეამცირა.

მას შემდეგ რუსეთი სირიის ახალ ადმინისტრაციასთან კავშირების აღდგენას ცდილობს. მისი მიზანი ყოფილი საბჭოთა კავშირის საზღვრებს გარეთ მდებარე ერთადერთი ორი სამხედრო ობიექტის შენარჩუნებაა. ამავე დროს, დამასკო ალ-ასადის ექსტრადირებას კვლავ მოითხოვს. ალ-ასადი ამჟამად მოსკოვში აფარებს თავს.