რუსეთის ნავთობგადამამუშავებელ ქარხანას დრონები მასშტაბურად დაესხნენ თავს

რუსეთის სამარის ოლქის გუბერნატორმა უკრაინა დაადანაშაულა გამთენიისას დრონებით განხორციელებულ თავდასხმაში, რომლის სამიზნეც ქალაქ ნოვოკუიბიშევსკში მდებარე ნავთობგადამამუშავებელი ქარხანა გახდა.

სამარის ოლქის გუბერნატორმა ვიაჩესლავ ფედორიშჩევმა რუსულ სახელმწიფო შეტყობინებების აპლიკაცია Max-ში გამოქვეყნებულ განცხადებაში თქვა: „ჩვენი რეგიონისა და ქვეყნის სამოქალაქო ინფრასტრუქტურაზე ტერორისტული თავდასხმების დროს საზიზღარმა მტერმა კიევიდან დრონების რეკორდული რაოდენობა გაუშვა. არავინ დაშავებულა, რაც ყველაზე მნიშვნელოვანია“.

რუსეთის თავდაცვის სამინისტროს ცნობით, პარასკევს ღამით რუსულმა საჰაერო თავდაცვის ძალებმა სამარის ოლქსა და რუსეთის კიდევ 18 რეგიონში უკრაინის 1 043 დრონი ჩამოაგდეს.

ფედორიშჩევმა ადგილობრივებს სთხოვა, არ გაემჟღავნებინათ, რას მოხვდა დრონები. თუმცა დამოუკიდებელმა რუსულმა მედიასაშუალება „ასტრამ“ ადგილობრივ ნავთობგადამამუშავებელ ქარხანაში ხანძრის შესახებ გაავრცელა ინფორმაცია. ქარხანა რუსეთის არმიისთვის საავიაციო საწვავს აწარმოებს. რუსული ნავთობკომპანიის, როსნეფტის (Rosneft), მონაცემებით, ნოვოკუიბიშევსკის ნავთობგადამამუშავებელ ქარხანას წელიწადში დაახლოებით 8,8 მილიონი ტონა ნავთობის გადამუშავება შეუძლია.

უოლ სტრიტ ჯორნალმა (The Wall Street Journal) ხუთშაბათს დაწერა, რომ ვაშინგტონის ზეწოლის შემდეგ კიევი დათანხმდა, რუსულ ნავთობგადამამუშავებელ ქარხნებზე დარტყმები შეეჩერებინა. გამოცემის ცნობით, ეს არაოფიციალური პაუზა 3 ნოემბერს აშშ-ის შუალედური არჩევნების დასრულებამდე უნდა გაგრძელდეს. ამ თვის დასაწყისში, მას შემდეგ, რაც დონალდ ტრამპმა ენერგეტიკულ ობიექტებზე ცეცხლის შეწყვეტა გამოაცხადა, უკრაინამ რუსულ ნავთობგადამამუშავებელ ქარხნებზე დრონებით თავდასხმები 72 საათით შეაჩერა. თუმცა კრემლი უკრაინის ენერგეტიკულ ინფრასტრუქტურაზე იერიშებს განაგრძობდა.

ვოლოდიმირ ზელენსკიმ კვირის დასაწყისში კიევში ჟურნალისტებს უთხრა: „ამან ვერ უშველა. ყველანაირი რიტორიკა იყო, მაგრამ იმ სამი დღისთვის მადლობა არავის გადაუხდია“.

პარასკევს დილის მდგომარეობით, უკრაინას ბოლო დარტყმაზე პასუხისმგებლობა არ აუღია, თუმცა უკრაინის სამხედრო-სამრეწველო კომპლექსმა ირონიული განცხადება გააკეთა.

უკრაინულმა თავდაცვის კომპანია Fire Point-მა, რომელიც შორ მანძილზე მოქმედ დრონებს აწარმოებს და კიევი მათ რუსეთში სამიზნეებზე იერიშებისთვის იყენებს, დილით ტელეგრამზე დაწერა: „პატარა დრონო, როგორ აღმოჩნდი იქ? ნოვოკუიბიშევსკის ნავთობგადამამუშავებელი ქარხანა უკრაინიდან სტუმრებს მიესალმება“.

რუსეთმა ღამით უკრაინას ბალისტიკური რაკეტებითა და 100-ზე მეტი დრონითაც შეუტია. კიევში ერთი ადამიანი დაიღუპა, დნიპროში კი 350 000 ადამიანი ელექტროენერგიის გარეშე დარჩა.