რუსეთმა უკრაინის ენერგოინფრასტრუქტურაზე უმსხვილესი იერიში მიიტანა

სერჰიი კორეცკის თქმით, ქვეყნის მასშტაბით ღამის თავდასხმებს სულ მცირე ხუთი ადამიანი ემსხვერპლა. დაღუპულთა შორის კიევის ოლქში მცხოვრები ბავშვიც იყო.

დარტყმებმა მოსახლეობისთვის ელექტროენერგიის მიწოდებაზეც იმოქმედა. უკრაინის უმსხვილესმა კერძო ენერგოკომპანია DTEK-მა განაცხადა, რომ დედაქალაქში „რთული ღამის“ შემდეგ 8 000 სახლს ელექტროენერგიის მიწოდება აღუდგა.

რუსეთის თავდაცვის სამინისტრომ განაცხადა, რომ ერთ-ერთი სამიზნე ტრიპილსკის ელექტროსადგური იყო, რომელიც კიევს ყველაზე მეტი ელექტროენერგიით ამარაგებს. ოპერატორმა სადგურის დაზიანება დაადასტურა.

კორეცკიმ Telegram-ზე დაწერა: „ზაფხულის შემდეგ ფაქტობრივად არც ერთი დღე არ გასულა ჩვენს ენერგოინფრასტრუქტურაზე მტრის თავდასხმის გარეშე.

თუმცა, ასეთი მასშტაბის მასობრივი და კომბინირებული თავდასხმა გასული გათბობის სეზონის დასრულების შემდეგ პირველად მოხდა“.

უკრაინა ქვეყნის ენერგოსისტემაზე რუსეთის კიდევ ერთ ხანგრძლივ იერიშს ელოდა. მსგავსი თავდასხმა ყოველ ზამთარს ხორციელდებოდა მას შემდეგ, რაც რუსეთმა 2022 წელს სრულმასშტაბიანი შეჭრა დაიწყო.

კორეცკის თქმით, ღამით ქვეყნის 11 რეგიონს შეუტიეს. სამიზნეებს შორის საცხოვრებელი შენობები, სოციალური ინფრასტრუქტურა, სამოქალაქო საწარმოები და რკინიგზაც იყო.

უკრაინის პრეზიდენტმა ვოლოდიმირ ზელენსკიმ განაცხადა, რომ ჟიტომირის, მიკოლაივის, კიროვოჰრადისა და რივნეს რეგიონების კრიტიკულ ინფრასტრუქტურას დაარტყეს.

უკრაინის ენერგეტიკის სამინისტრომ განაცხადა, რომ ოთხშაბათს კიევის, დნიპროპეტროვსკის, დონეცკის, სუმისა და ხარკოვის რეგიონებში რამდენიმე ოჯახს ელექტროენერგია კვლავ არ მიეწოდებოდა.

სახელმწიფო ქსელის ოპერატორმა Ukrenergo-მ მოსახლეობას ურჩია, ადგილობრივი დროით 10:00-დან 16:00-მდე მძლავრი ელექტრომოწყობილობები არ გამოეყენებინა. ელექტროენერგიის მიწოდება ჩვეულებრივზე ნაკლები იყო.

კიევის მცხოვრებლებს დილით ქალაქი სქელი, მძაფრი კვამლით დაფარული დახვდათ. მთელი ღამის განმავლობაში აფეთქებების ხმა ისმოდა. საჰაერო განგაში კვლავ მოქმედებდა, ხოლო ბურუსში შორიდან საჰაერო თავდაცვის ცეცხლის ხმა გაისმოდა.

ხელისუფლებამ რამდენიმე რაიონის მცხოვრებლებს კვამლის გაფანტვამდე ფანჯრების დახურვა ურჩია.

კიევის რეგიონის ხელმძღვანელმა თემურ ტკაჩენკომ განაცხადა, რომ ღამის დარტყმებისას დაღუპულთა შორის ბავშვიც იყო. მისი ცხედარი სახლის ნანგრევებში იპოვეს.

კიევის მერმა ვიტალი კლიჩკომ თქვა, რომ დედაქალაქში სულ სამი ადამიანი დაიღუპა. მათ შორის იყო უკრაინული კომუნალური კომპანიის თანამშრომელი, რომელიც საწყობის შენობაში დაიღუპა.