რუსეთში სავარაუდო შავი ჭირის შემთხვევამ ევროკავშირი შეაშფოთა

პრესსპიკერმა ევა ჰრნჩიროვამ ჟურნალისტებს უთხრა: „ჩვენთვის ცნობილია რუსეთში მომხდარი ლაბორატორიული ინციდენტის შესახებ გავრცელებული ცნობები. როგორც ჩანს, შემთხვევა შავი ჭირის გამომწვევ პათოგენს უკავშირდება“. მან დასძინა: „დაავადებათა პრევენციისა და კონტროლის ევროპული ცენტრის ექსპერტებთან კავშირი გვაქვს და მიმდინარე მოვლენებს ძალიან ყურადღებით ვაკვირდებით“.

ციმბირისა და შორეული აღმოსავლეთის ირკუტსკის შავი ჭირის საწინააღმდეგო ინსტიტუტის 28 წლის თანამშრომელი ავად გახდა და პარასკევს გარდაიცვალა. მეზობელი ბურიატიის რესპუბლიკის ხელმძღვანელმა ალექსეი ციდენოვმა განაცხადა, რომ შესაძლოა, ეს ფილტვის შავი ჭირის შემთხვევა ყოფილიყო.

რუსეთის მომხმარებელთა უფლებების დაცვის სამსახურს (Rospotrebnadzor) გარდაცვალების ზუსტი მიზეზი არ დაუდასტურებია. უწყების განცხადებით, თანამშრომელი „უცნობი ეტიოლოგიის პნევმონიით“ გარდაიცვალა. მისი გარდაცვალების შემდეგ 200-ზე მეტი ადამიანი დაკვირვების ქვეშ მოათავსეს.

ჯანმოს ცნობით, შავი ჭირი ინფექციური დაავადებაა, რომელსაც ბაქტერია Yersinia pestis იწვევს. ის, ჩვეულებრივ, მცირე ძუძუმწოვრებსა და მათ რწყილებში გვხვდება. დაავადება ანტიბიოტიკებით მკურნალობას ექვემდებარება. ჰრნჩიროვას თქმით, ევროპაში ის 50 წელზე მეტია არ გამოვლენილა, თუმცა ამერიკაში, აფრიკასა და აზიაში კვლავ გვხვდება.

ფილტვის შავი ჭირი დაავადების ყველაზე გადამდები ფორმაა, რადგან ის ადამიანიდან ადამიანს სასუნთქი გზებიდან გამოყოფილი ნაწილაკებით გადაეცემა. მისი ინკუბაციური პერიოდი შედარებით ხანმოკლეა. სიმპტომები, მათ შორის სუნთქვის გაძნელება და ხველა, ინფიცირებიდან, ჩვეულებრივ, 24 საათში ვლინდება. მკურნალობის გარეშე შავი ჭირით სიკვდილიანობის მაჩვენებელი 30%-დან 100%-მდე მერყეობს.