საფრანგეთი სუპერმარკეტებზე კიბერშეტევებში ირანს ადანაშაულებს

„ეროვნულ ტერიტორიაზე საბოტაჟის მიზნით განხორციელებული პირველი კიბერშეტევითი კამპანია“

საფრანგეთმა ირანზე ზეწოლა გააძლიერა მას შემდეგ, რაც ოქტომბერში 700-ზე მეტი სასურსათო მაღაზიის სამაცივრო სისტემების მართვის მოწყობილობებზე დამანგრეველი კიბერშეტევები განხორციელდა. თავდასხმებმა საკვები გააფუჭა და ხანძრები გამოიწვია. ქვეყანამ პირობა დადო, რომ „რეაგირების ყველა ხელმისაწვდომ საშუალებას“ გამოიყენებდა.

საფრანგეთის კიბერკრიზისების კოორდინაციის ცენტრის (C4) ორშაბათის ანგარიშის თანახმად, სუპერმარკეტებზე თავდასხმები შეეხო ქსელებს Casino-ს, Leclerc-ს, Coopérative U-ს, Metro-ს, Carrefour-სა და Intermarché-ს. მათ სულ მცირე 15 ხანძარი გამოიწვია, ხოლო გაფუჭებული საკვების ღირებულებამ ათეულობით მილიონ ევროს მიაღწია.

C4-ში შედიან საფრანგეთის კიბერუსაფრთხოების ეროვნული სააგენტო, საგარეო უსაფრთხოების გენერალური დირექტორატი, შიდა უსაფრთხოების გენერალური დირექტორატი, შეიარაღების გენერალური დირექტორატი და კიბერთავდაცვის სარდლობა.

ევროპისა და საგარეო საქმეთა სამინისტრომ განცხადებაში აღნიშნა: „ეს უპრეცედენტო კამპანიაა მასშტაბითა და აგრესიულობის დონით და, შესაბამისად, პირველი კიბერშეტევითი კამპანიაა, რომელიც ეროვნულ ტერიტორიაზე მხოლოდ საბოტაჟის მიზნით განხორციელდა“.

ანგარიშმაც და განცხადებამაც სამაცივრო სისტემების მართვის მოწყობილობებზე თავდასხმები ირანის ისლამური რევოლუციის გვარდიის კორპუსის (IRGC) კიბერდანაყოფ „შაჰიდ კავეს“ მიაწერა. საფრანგეთის ეროვნული უსაფრთხოების წარმომადგენლების თქმით, დანაყოფს რეზა სალავანდი და მაჰდი ლაშგარიანი ხელმძღვანელობენ. ის უფრო ცნობილია თავისი ჰაქტივისტური სახელებით, მათ შორის CyberAv3ngers-ით.

იგივე ჯგუფს ეჭვობენ ივლისში მომხდარ თავდასხმებში მონაწილეობაში. მაშინ ამერიკაში ინტერნეტთან დაკავშირებულ 100-ზე მეტ წყლის სისტემას დაესხნენ თავს. აშშ-ის მთავრობას შეჭრები არც ერთი ქვეყნისთვის და არც ერთი ჯგუფისთვის არ მიუწერია, თუმცა კერძო სექტორის უსაფრთხოების ანალიტიკოსებმა პასუხისმგებლობა ირანს, კერძოდ კი CyberAv3ngers-ს დააკისრეს.

გვარდიასთან დაკავშირებული ჰაკერული ჯგუფი წლებია სამრეწველო მართვის მოწყობილობებში შეღწევას ცდილობს. 2023 წელს კი ამერიკის ეროვნული უსაფრთხოებისა და სამართალდამცავმა უწყებებმა აშშ-ის წყლის რამდენიმე ობიექტზე განხორციელებული კიბერშეტევების სერია CyberAv3ngers-ს მიაწერეს.

ევროპისა და საგარეო საქმეთა სამინისტროს თანახმად, „ირანის კიბერსაფრთხე საფრანგეთის ინტერესებისთვის ახალი არ არის“. სამინისტრომ დასძინა: „ირანმა უკვე განახორციელა ჩვენს წინააღმდეგ რამდენიმე დესტაბილიზაციისკენ მიმართული ქმედება, მათ შორის 2023 წელს ყოველკვირეულ ჟურნალ Charlie Hebdo-ზე და 2024 წელს პარიზის ოლიმპიური თამაშების ორგანიზებაზე თავდასხმა“.