შეფჩოვიჩი პეკინში ევროკავშირისა და ჩინეთის სავაჭრო დავის მოგვარებას ეცდება

ერთკვირიანი ეროვნული დღესასწაულების შემდეგ, ჩინეთში სახელმწიფო უწყებებმა მუშაობა დღეს განაახლეს. ევროკავშირის ეკონომიკური დელეგაციის ვიზიტი დღის წესრიგის ერთ-ერთი პირველი საკითხია.

ჩინეთის ვაჭრობის მინისტრმა ვან ვენტაომ ევროკავშირის ვაჭრობის კომისარი მაროშ შეფჩოვიჩი ნაშუადღევს პეკინში მიიღო. ჩინეთის მხარე დღესასწაულების დროსაც ყურადღებით აკვირდებოდა ევროკომისიის დისკუსიებს ბრიუსელში და ევროპარლამენტის განხილვებს სტრასბურგში.

ჩინეთის მხარე ასევე აკვირდებოდა, რა თქვა გერმანიის კანცლერმა ფრიდრიხ მერცმა კვირის დასაწყისში ბერლინში. მერცმა განაცხადა: „ჩვენ გვსურს, კომისიას ჰქონდეს ინსტრუმენტი, რომლითაც სწრაფ რეაგირებას შეძლებს. მას, რა თქმა უნდა, ევროპული საბჭო ყოველთვის გააკონტროლებს. თუმცა გადაწყვეტილების რაც შეიძლება სწრაფად მიღებაც შესაძლებელი უნდა იყოს, როცა ამას სავაჭრო პოლიტიკის გამოწვევები მოითხოვს“.

გერმანიისა და საფრანგეთის ინიციატივამ პეკინის ხელმძღვანელობის უკმაყოფილება გამოიწვია. ქვეყნები ევროკავშირისთვის დამცავი ინსტრუმენტების მინიჭებას ითხოვენ, რათა მან უსამართლოდ მიჩნეული სავაჭრო პრაქტიკის წინააღმდეგ უფრო მკაცრად იმოქმედოს. ჩინეთის ვაჭრობის სამინისტრომ წერილობით განაცხადა, რომ ჩინეთი მტკიცედ უპასუხებს, თუ ევროკავშირი ევროპულ ბაზარზე ჩინური კომპანიების დისკრიმინაციას შეეცდება.

ჩინეთი გერმანიასა და საფრანგეთს სავაჭრო საკითხების პოლიტიზებასა და ევროკავშირის პროტექციონიზმისკენ წაქეზებაში ადანაშაულებს. სამინისტროს განცხადებით, ეს მცდარი გზაა, რომელიც საბოლოოდ ორივე ქვეყანასვე დააზარალებს. ჩინეთი იმედოვნებს, რომ გერმანია და საფრანგეთი ღია თანამშრომლობასა და თავისუფალ ვაჭრობას შეინარჩუნებენ.

ჩინეთში მომუშავე ევროპულ კომპანიებსაც თავისუფალი ვაჭრობა და ბაზარზე თავისუფალი და სამართლიანი წვდომა სურთ. ისინი წლებია, რამდენიმე სექტორში ჩინეთის სახელმწიფო კომპანიებისთვის უპირატესობის მინიჭებას უჩივიან. ეს, მაგალითად, ტენდერებს ეხება. კომპანიები ბიუროკრატიულ დაბრკოლებებზეც მიუთითებენ.

პეკინის ევროპული სავაჭრო პალატის (European Union Chamber of Commerce in China) გენერალურმა მდივანმა ადამ დანეტმა განაცხადა, რომ ჩინეთში ევროპული კომპანიები შეფჩოვიჩის პირისპირ შეხვედრებისგან ბევრს ელიან. მისი თქმით, ეს განსაკუთრებით მნიშვნელოვანია, რადგან ჩინეთში გადაწყვეტილებებს უმაღლეს დონეზე იღებენ. დანეტმა თქვა: „შეფჩოვიჩის თქმით, ჩინეთს ესმის პრობლემები, რომელთა წინაშეც ევროპაში ვდგავართ. იმედი მაქვს, ეს სიმართლეა. ამიტომ იმედი მაქვს, ისინი იპოვიან სხვადასხვა სექტორს, სადაც ბაზრის კიდევ ოდნავ მეტად გახსნა შეეძლებათ, რათა ევროპიდან ჩინეთში მეტი საქონლის გაყიდვა შევძლოთ. ეს შესანიშნავი იქნებოდა“.