ტრამპი კანადასთან დაახლოების გამო ევროკავშირს ტარიფებით ემუქრება

აშშ-ის პრეზიდენტი დონალდ ტრამპი ევროკავშირს ახალი ტარიფებით ან ვაჭრობის შეწყვეტით დაემუქრა, თუ ევროპა კანადასთან თანამშრომლობას გააღრმავებს. მისი თქმით, ევროკავშირში კანადის შესაძლო ასოცირებული წევრობა აშშ-ისთვის საზიანოა.

ტრამპმა ოთხშაბათს ჟურნალისტებს განუცხადა: „თუ ისინი ამას გააკეთებენ და მე მივიჩნევ, რომ ეს რაიმე ფორმით მტრული ქმედებაა, ძალიან მკაცრ ტარიფებს დავაწესებ ან ბევრ სფეროში ევროპასთან ვაჭრობას შევწყვეტ“. მან ეს პასუხი შესაბამის წინადადებაზე დასმულ შეკითხვას გასცა.

ამ განცხადებას ევროპაში დაუყოვნებლივ მოჰყვა კრიტიკა. საფრანგეთის ევროპულ საქმეთა მინისტრმა ბენჟამენ ადადმა ხუთშაბათს ტელეარხ Public Sénat-ს განუცხადა, რომ ევროპელების გეოპოლიტიკური მიმართულება არც აშშ-მ და არც სხვამ უნდა განსაზღვროს. მისი თქმით, ევროკავშირს კანადასთან ურთიერთობების გაღრმავების სრული უფლება აქვს.

ევროკომისიის პრეზიდენტმა ურსულა ფონ დერ ლაიენმა კანადისთვის ევროკავშირის პირველი ასოცირებული წევრის სტატუსის მინიჭება შესთავაზა. მან თქვა, რომ ამ იდეაზე კანადის პრემიერ-მინისტრ მარკ კარნისთან მუშაობა სურს. ფონ დერ ლაიენმა ეს შეთავაზება ოთხშაბათს სტრასბურგში, ევროკავშირის მდგომარეობის შესახებ სიტყვით გამოსვლისას გააკეთა. კარნი გამოსვლას ესწრებოდა.