წარმომადგენელთა პალატა რუსეთის სანქციების კანონპროექტს უყრის კენჭს

აშშ-ის წარმომადგენელთა პალატა ოთხშაბათს დღის მეორე ნახევარში, სავარაუდოდ, რუსეთის სანქციების კანონპროექტს მიიღებს. კანონპროექტი გარდაცვლილმა რესპუბლიკელმა სენატორმა ლინდსი გრემმა ერთ წელზე მეტი ხნის წინ წარადგინა. მიღების შემდეგ დოკუმენტი პრეზიდენტ დონალდ ტრამპს გადაეგზავნება.

კანონპროექტს „ლინდსი ო. გრემის 2026 წლის რუსეთისა და ირანის სანქცირების აქტი“ ეწოდება. ის რუსეთის ეკონომიკის წინააღმდეგ ზომებს ითვალისწინებს, რათა ქვეყანა უკრაინაში სრულმასშტაბიანი შეჭრის გაგრძელებისთვის დაისაჯოს.

კანონპროექტი ტრამპს 100%-მდე საბაჟო ტარიფების დაწესების უფლებას მისცემს. ზომა შეეხება ქვეყნებს, მათ შორის ჩინეთსა და ინდოეთს, რომლებიც რუსული ნედლი ნავთობის ან გაზის ხუთ უმსხვილეს მყიდველს შორის არიან. ნავთობის გაყიდვიდან მიღებული თანხა რუსეთის ომის დაფინანსებისთვის გადამწყვეტია. კანონპროექტი ასევე რუსეთის ლიდერებს, ოფიციალურ პირებსა და ფინანსურ ინსტიტუტებს სანქციებს დაუწესებს და ირანის წინააღმდეგ სანქციებს გააფართოებს.

სენატორებმა გასულ თვეში კანონპროექტს დიდი უმრავლესობით დაუჭირეს მხარი. ძლიერი ორპარტიული მხარდაჭერით ის 86:11 ხმით მიიღეს. თუმცა, მოწინააღმდეგეები აცხადებენ, რომ კანონპროექტი ტრამპს საბაჟო ტარიფებთან დაკავშირებით ზედმეტად ფართო უფლებამოსილებას ანიჭებს.

დემოკრატმა წარმომადგენლებმა გრეგორი მიქსმა, დონ ბაიერმა და რიჩარდ ნილმა გასულ კვირას ერთობლივ განცხადებაში აღნიშნეს, რომ წარმომადგენელთა პალატის დემოკრატები უკრაინას მტკიცედ უჭერენ მხარს, თუმცა ეს კანონპროექტი „სარგებელზე მეტ ზიანს მოიტანს“.

კანონმდებლებმა განაცხადეს: „ეს კანონპროექტი პრეზიდენტის უფლებამოსილებას საბაჟო ტარიფების სფეროში მკვეთრად გააფართოებს, თუმცა რუსეთის წინააღმდეგ სანქციების დაწესებას სავალდებულოს არ გახდის. ორივე მიუღებელია. ეს ხარვეზები ამერიკელებისთვის ფასებს გაზრდის და გრძელვადიან პერსპექტივაში უკრაინის მხარდაჭერას შეასუსტებს“.

თეთრი სახლის ოფიციალურმა პირმა დაადასტურა, რომ წარმომადგენელთა პალატის მიერ კანონპროექტის მიღების შემთხვევაში ტრამპი მის ხელმოწერას და კანონად ქცევას აპირებს.