ტუხელი ინგლისის შეტევაში ბელინგემს ალტერნატივად განიხილავს

ჰარი კეინის ალტერნატივების ძიებისას თომას ტუხელმა ინგლისის ნაკრების მეცხრე ნომრის პოზიციაზე ჯუდ ბელინგემიც განიხილა. კეინმა სამშაბათს ერთა ლიგაზე ჩეხეთის წინააღმდეგ 2:0 მოგებულ მატჩში შესანიშნავი შედეგიანობა კვლავ აჩვენა. პრაღაში გვიან გატანილი გოლით მან სანაკრებო კარიერაში 123 შეხვედრაში 87 გოლი დააგროვა, თუმცა თავდასხმაში შემცვლელი თითქმის არ ჰყავს.

ტუხელს ჯერ კეინის გარეშე გუნდის წარმოდგენა არ უწევს. ინგლისის მთავარმა მწვრთნელმა 33 წლის თავდამსხმელს უმაღლეს დონეზე კიდევ ათი წლის თამაშის შანსი მისცა და მალე ნაკრებში 100 გოლის გატანაც უწინასწარმეტყველა. მან ასევე აღნიშნა, რომ ინგლისი თავისი საუკეთესო თავდამსხმელის ზუსტ ასლს ვერ გამოზრდის. თუმცა გუნდის შეტევითი სიღრმე შეშფოთებას იწვევს.

ამ შეკრებაზე ოლი უოტკინსი და აივან ტონი არ გამოიძახეს. დომინიკ კალვერტ-ლუინი, რომელმაც შაბათს ესპანეთთან მარცხისას კეინი შეცვალა, 29 წლისაა და ნაკრებში 13 შეხვედრაში ოთხი გოლი აქვს. ნოტინგემ ფორესტის 23 წლის თავდამსხმელი ლიამ დელაპი ეროვნულ ნაკრებში ჯერ არ გამოუძახებიათ. ჩეხეთთან მატჩის მიწურულს კი კეინის შეცვლის შემდეგ შეტევის წვერზე ბელინგემი თამაშობდა.

ტუხელმა თქვა: „უპირველესად, სხვა ჰარი კეინს ვერ იპოვით. ჩვენ განსხვავებულ გამოსავლებს ვეძებთ. მატჩი ჯუდით დავასრულეთ, რომელიც მეცხრე ნომრად თამაშობდა. სხვა ვინმე გამოჩნდება, მაგრამ ის ჰარი ან ჰარის ასლი არ იქნება. როცა ამის დრო მოვა, გამოსავალს ვიპოვით, თუმცა შეიძლება ეს მე არ მომიწიოს. შესაძლოა, კიდევ ათი წელი გავიდეს“.

სამშაბათს პრაღაში ბელინგემი სათადარიგოთა სკამიდან ჩაერთო და კაპიტნის სამკლავური მოირგო. ტუხელმა თქვა: „ის მეცხრე ნომრად მომწონს. ამ პოზიციიდან ორივე ფლანგს ეხმარება, იქ რიცხობრივ უპირატესობას ქმნის და გუნდის ბალანსს ნაკლებად არღვევს. ბოლო მატჩში მისთვის გარკვეულწილად ახალი როლი ვიპოვეთ, ცენტრალური მეათე ნომრის პოზიცია. ასე ორივე ფლანგზე შეუძლია გადასვლა. ეს უფრო 4-2-3-1 სქემაა, ვიდრე 4-3-3. ამგვარად, ჰარი და ჯუდი ერთმანეთთან უფრო ახლოს არიან და ორივე ფლანგზე რიცხობრივი უპირატესობის შექმნა შეუძლიათ.

„ამაზე ვმუშაობთ. ზოგადად, ჯუდს ყოველთვის უნდა შეეძლოს დაცვის ბოლო ხაზის უკან გასვლა და საჯარიმოში მოხვედრა. ის ბუნებრივი გოლის გამტანია და გატანის წყურვილი აქვს. მას გადამწყვეტი მოქმედების შესრულება სურს. ამიტომ დიდი სხვაობა არ არის, მეცხრე ნომრად ითამაშებს თუ მეათედ“.

ჩეხეთის დამარცხების შემდეგ ინგლისი ერთა ლიგის A3 ჯგუფში მეორე ადგილზე გადავიდა. ჩეხეთი პირველი ტაიმის შუაში ათი ფეხბურთელით დარჩა. ანგარიში ენტონი გორდონმა გახსნა, ხოლო მატჩის ბოლოს კეინმა ზუსტად დაარტყა.

ტუხელმა თქვა: „ბურთი ძირს ეშვება და ხედავთ, რომ ჰარი ურტყამს. ზუსტად ის ფეხბურთელია, ვისთანაც გინდათ, ბურთი აღმოჩნდეს. ამას ყოველ მატჩში აკეთებს. ეს დარტყმის უმაღლესი დონეა“.