უკრაინული დრონების საფრთხემ რუსეთის სამთავრობო რეისები შეაფერხა

რაზმის ხუთმა თვითმფრინავმა დაუყოვნებლივ დაშვება ვერ შეძლო. რუსული მედიასაშუალებებისა და Telegram-არხების ცნობით, სულ მცირე, სამი თვითმფრინავი თურქმენეთიდან ბრუნდებოდა. იქ რუსეთის პრეზიდენტი ვლადიმერ პუტინი დამოუკიდებელ სახელმწიფოთა თანამეგობრობის სამიტს დაესწრო. „აგენტსტვოს“ (Agentstvo) ცნობით, სამივე Il-96 იყო, ამ ტიპის თვითმფრინავს პრეზიდენტის გადასაყვანად იყენებენ.

Flightradar24-ის მონაცემებით, ორი Il-96, სარეგისტრაციო ნომრებით RA-96020 და RA-96022, მოსკოვისა და მის გარშემო რეგიონის თავზე წრეზე დაფრინავდა. ისინი თურქმენბაშის აეროპორტიდან 14:00-სა და 14:15-ზე გაფრინდნენ. თვითმფრინავები მოსკოვის ვნუკოვოს აეროპორტში, შესაბამისად, 18:06-სა და 18:21-ზე დაეშვნენ.

მესამე Il-96, სარეგისტრაციო ნომრით RA-96025, თურქმენბაშიდან 15:52-ზე გაფრინდა. განრიგით, თვითმფრინავი ვნუკოვოში უნდა დაშვებულიყო, თუმცა მოსკოვს გადაუფრინა. საბოლოოდ, ის სანქტ-პეტერბურგის პულკოვოს აეროპორტში გადაამისამართეს, საიდანაც მოგვიანებით მოსკოვისკენ გაფრინდა.

მოსკოვის ყველა აეროპორტში შეზღუდვები დაახლოებით 15:40-ზე დაწესდა და 18:40-ისთვის სრულად გაუქმდა. „ოსტოროჟნო, ნოვოსტის“ (Ostorozhno, Novosti) შეფასებით, შეზღუდვების გამო 200-ზე მეტი რეისი გადაიდო, ხოლო 100-ზე მეტი გაუქმდა.

უცნობია, რომელ თვითმფრინავში იმყოფებოდა პუტინი. TASS-მა 13:52-ზე გაავრცელა ინფორმაცია, რომ პრეზიდენტმა თურქმენეთში ვიზიტი დაასრულა. სააგენტოს ცნობით, ის „როსიას“ ერთ-ერთ თვითმფრინავში ავიდა, რომელიც თურქმენბაშიდან გასაფრენად ემზადებოდა. „აგენტსტვოს“ ვარაუდით, პუტინი შესაძლოა RA-96025-ში იმყოფებოდა. პრეზიდენტი 8 ოქტომბერს თურქმენეთში ამ თვითმფრინავით ჩავიდა.

უკრაინის პრეზიდენტი ვოლოდიმირ ზელენსკი სექტემბრის დასაწყისში რუსეთს „ცის ჩაკეტვით“ დაემუქრა. პუტინმა ამ განცხადებას „სახელმწიფო ტერორიზმის ჩადენის განზრახვის სიგნალი“ უწოდა. უკრაინის მუქარის პასუხად, რუსეთის ტრანსპორტის სამინისტრომ განაცხადა, რომ ქვეყნის საავიაციო სამსახურები სამოქალაქო ავიაციის მუშაობაში „მნიშვნელოვან შეფერხებებს“ არ დაუშვებდნენ.