„ვოიაჯერ 1“ 17 დღეში დედამიწიდან ერთი სინათლის დღის მანძილზე მივა

„ვოიაჯერ 1“ კოსმოსური ხომალდი, რომელიც იუპიტერისა და სატურნის შესასწავლად ხუთწლიანი მისიისთვის შეიქმნა, თითქმის 50-წლიანი ფრენის შემდეგ დედამიწიდან ერთი სინათლის დღის მანძილზე მისვლას აპირებს. NASA-ს ცნობით, კოსმოსური ზონდი ამ ნიშნულს 2026 წლის 18 ნოემბერს, აღმოსავლეთის დროით დილის 5:16:07 საათზე მიაღწევს. ამით ის ისტორიაში ყველაზე შორეული ხელოვნური ობიექტი გახდება. სააგენტომ ისტორიული მომენტის აღსანიშნავად უკუთვლის საათი გამოაქვეყნა. მაშინ „ვოიაჯერ 1“ პირველი ადამიანის მიერ შექმნილი ობიექტი გახდება, რომელიც ამ მანძილს მიაღწევს.

ერთი სინათლის დღე დროის მონაკვეთი კი არა, მანძილია, რომელსაც სინათლე 24 საათში გადის. სინათლე წამში დაახლოებით 186 282 მილს, ანუ 300 000 კილომეტრს გადის, ამიტომ ეს მანძილი დაახლოებით 16 მილიარდი მილი, ანუ 26 მილიარდი კილომეტრია. შედარებისთვის, მთვარე დედამიწიდან 238 855 მილით (384 400 კილომეტრით) არის დაშორებული, ჩვენი პლანეტა კი მზიდან 93 მილიონი მილით (149,6 მილიონი კილომეტრით).

მზესთან მიმართებით „ვოიაჯერ 1“-ის სავარაუდო სიჩქარე საათში 37 844,49 მილია. ეს საკმაოდ მაღალი სიჩქარეა, თუმცა ხომალდი ყველაზე სწრაფი ადამიანის მიერ შექმნილი ობიექტი არ არის. რეკორდი „პარკერის“ მზის ზონდს ეკუთვნის, რომლის სიჩქარეც საათში 394 736 მილს აღწევს. მიუხედავად ამისა, ზონდს დედამიწიდან ერთი სინათლის დღის მანძილზე მისასვლელად 49 წელი, 2 თვე და 13 დღე დასჭირდება.

ეს „ვოიაჯერ 1“-ის ერთ-ერთი მიღწევაა: NASA-ს მეცნიერებმა მისიის თავდაპირველ ხანგრძლივობასთან შედარებით ხომალდის მოქმედების ვადა თითქმის ათჯერ გაზარდეს. ზონდს პრობლემებიც შეექმნა. 2024 წელს მეხსიერებაში კრიტიკული შეცდომა მოხდა, რომლის გამოსწორებაც ინჟინრებმა რამდენიმე კვირიანი დიაგნოსტიკის შემდეგ შეძლეს. დიდმა მანძილმა ხომალდის შეკეთება საგრძნობლად გაართულა. იმ დროისთვის სიგნალის დაყოვნება უკვე 22 საათზე მეტი იყო, ხოლო ორმხრივ კავშირს სულ მცირე 45 საათი სჭირდებოდა. მიმდინარე წლის დასაწყისში NASA-ს ენერგიის დონის მოულოდნელი ვარდნის შემდეგ ინსტრუმენტების ავარიული გამორთვის პროცედურის გამოყენება მოუწია.

ექსპერტების შეფასებით, ხომალდის სამ რადიოიზოტოპურ თერმოელექტრულ გენერატორს საკმარისი ენერგია აქვს, რომ „ვოიაჯერ 1“-მა მუშაობა 2030-იან წლებამდე გააგრძელოს. თუ მნიშვნელოვანი პრობლემა არ შეექმნა, ზონდი ვარსკვლავთშორის სივრცეში ფრენას და დედამიწაზე მონაცემების გამოგზავნას განაგრძობს. მისი კურსი AC +79 3888-ის, ანუ გლიზე 445-ისკენაა მიმართული. ეს ვარსკვლავი მცირე დათვის თანავარსკვლავედში მდებარეობს. მოსალოდნელია, რომ ხომალდი მას 1,7 სინათლის წლის მანძილზე, 17 სინათლის წელიწადში ჩაუვლის. თუმცა „ვოიაჯერ 1“ სინათლის სიჩქარის მხოლოდ 0,00564325%-ით გადაადგილდება. ჩვენი შეფასებით, შემდეგ დანიშნულების ადგილამდე მისასვლელად მას 300 000 წელზე მეტი დასჭირდება.