AfD და BSW უკრაინის დახმარების შეწყვეტას ერთობლივად მოითხოვენ

რეზოლუციის ავტორები პარლამენტს მოუწოდებენ, განაცხადოს, რომ რუსეთისთვის სანქციების დაწესებისა და უკრაინისთვის იარაღისა და ფინანსური დახმარების მიწოდების პოლიტიკა წარუმატებელი აღმოჩნდა. მათი თქმით, უკრაინაში შემდგომი ესკალაცია თავიდან უნდა აიცილონ. ისინი „მშვიდობის ხელშემწყობ პოლიტიკას“ მოითხოვენ.

ავტორები მოითხოვენ „ცეცხლის დაუყოვნებლივ შეწყვეტასა და რუსეთთან სამშვიდობო მოლაპარაკებების დაწყებას“. ისინი ასევე გერმანიასა და რუსეთს შორის ნორმალური ეკონომიკური ურთიერთობების აღდგენასა და სანქციების გაუქმებას ითხოვენ.

რეზოლუციის კენჭისყრა 14 ოქტომბერსაა დაგეგმილი. დოიჩე ველესა და როიტერსის ცნობით, კენჭისყრას სიმბოლური მნიშვნელობა ექნება, რადგან ფედერალური მიწების მთავრობები გერმანიის საგარეო პოლიტიკაზე გავლენას ვერ ახდენენ. თუმცა, როიტერსის ცნობით, ინიციატივა აჩვენებს, რომ AfD კვლავ ცდილობს, გერმანიას უკრაინის მხარდაჭერა შეაწყვეტინოს და რუსეთთან კავშირები აღადგინოს.

„სოციალური სამართლიანობის კავშირის“ წარმომადგენლებმა განაცხადეს, რომ გერმანიას ისეთი პოლიტიკა სჭირდება, რომელიც კიევზე წინ საქსონია-ანჰალტის ქალაქ კიოტენს დააყენებს.

სექტემბრის დასაწყისში „ალტერნატივამ გერმანიისთვის“ საქსონია-ანჰალტის არჩევნებში ხმების 43,8% მიიღო, რაც პარტიის ისტორიაში საუკეთესო შედეგია. პარტიამ ფედერალური მიწის პარლამენტის 83 ადგილიდან 39 მოიპოვა. „სოციალური სამართლიანობის კავშირთან“ ერთად მას 44 ადგილი აქვს.

AfD-მ განაცხადა, რომ გერმანიაში გაზის მიწოდების აღდგენის შესახებ რუსეთთან მოლაპარაკებები უკვე მიმდინარეობდა. პარტიის საგარეო პოლიტიკის პრესსპიკერმა მარკუს ფრონმაიერმა საკითხი გაზპრომის ხელმძღვანელ ალექსეი მილერთან განიხილა.