Anthropic-მა Claude-ის გამოყენებასთან დაკავშირებული ჩინური ოპერაციები გამოავლინა

Anthropic-ის 2026 წლის სექტემბრის საფრთხეების ანგარიშის თანახმად, ჩინეთთან დაკავშირებულმა ასობით აგენტმა Anthropic-ის მოდელები სულ მცირე ხუთ პროგრამაში გამოიყენა. მათგან ორი სამხედრო, ორი სათვალთვალო, ხოლო ერთი Claude-ის შესაძლებლობების დისტილაციას ემსახურებოდა.

ჩინეთში მოქმედმა ერთმა პირმა Claude-ის დახმარებით ტორპედოსაწინააღმდეგო სისტემის ცეცხლის მართვის სპეციფიკაცია შეადგინა. მოდელმა სისტემა საჯარო ინფორმაციაზე დაყრდნობით აშშ-ის საზღვაო ძალების ტორპედოსაწინააღმდეგო და წყალქვეშა ნავების საწინააღმდეგო სისტემებთან მიმართებით გამოცადა. მან სავარაუდო კლიენტისთვის 200-ზე მეტი გვერდისგან შემდგარი ტექნიკური წინადადებაც მოამზადა. ეს პირი თავს აშშ-ის თავდაცვის სექტორის მწარმოებლად ასაღებდა. თუმცა Anthropic მიიჩნევს, რომ ის ჩინურ თავდაცვით კომპანიასთან იყო დაკავშირებული, რომელსაც ჩინეთის სახალხო განმათავისუფლებელი არმიის სამხედრო-საზღვაო ძალებისთვის სისტემის შექმნა სურდა.

ჩინეთში მოქმედმა კიდევ ერთმა თავდაცვისა და სამხედრო მრეწველობის მკვლევარმა Claude-ით ელექტრონული ომისა და მოწინააღმდეგის საჰაერო თავდაცვის ჩახშობისთვის დაახლოებით 16 პროგრამული მოდული შექმნა. პროგრამა რადარებს, საზენიტო-სარაკეტო სისტემების პოზიციებს, სამეთაურო პუნქტებსა და საკომუნიკაციო კვანძებს აანალიზებდა და სამიზნეებს პრიორიტეტებს ანიჭებდა. ერთ-ერთ სტანდარტულ სცენარში ტაივანზე 12 სამიზნე იყო, მათ შორის Patriot-ისა და Tien Kung-ის ბატარეები, ავიაბაზები, ადრეული გაფრთხილების რადარი და სამეთაურო ბუნკერი. Anthropic-ის განცხადებით, ანგარიშის მეტამონაცემები და დაცვის სისტემების მიერ აღმოჩენილი შინაარსი ჩინეთის კვლევით დაწესებულებებთან კავშირზე მიუთითებდა. მათ შორის ჩინეთის სახალხო განმათავისუფლებელი არმიის სამხედრო მეცნიერებათა აკადემია იყო. თუმცა კომპანიას პირდაპირ არ უთქვამს, რომ Claude არმიამ გამოიყენა.

ჩინეთის მნიშვნელოვანი შესაძლებლობების მიუხედავად, ორი სამხედრო პროექტისთვის Claude-ის არჩევა საყურადღებოა. Anthropic-მა ჩინურენოვანი მოთხოვნები და ანგარიშებთან დაკავშირებული სხვა მტკიცებულებები აღმოაჩინა. შესაბამისად, ადგილობრივი მოდელების ნაცვლად Claude-ის გამოყენების მთავარი მიზეზი კავშირის დამალვა ნაკლებად სავარაუდოა. შესაძლოა, ის კოდის წერის, მსჯელობისა და ავტონომიური ამოცანებისთვის უკეთესი ან უფრო მოსახერხებელი იყო. ამასთან, აშშ-ის მოწინავე მოდელები ინგლისურენოვანი მასალების უზარმაზარ მოცულობაზეა გაწვრთნილი. ამიტომ მათ აშშ-ის სამხედრო ტექნოლოგიებისა და სისტემების შესახებ საჯაროდ ხელმისაწვდომი ინფორმაციის ფართო ცოდნა შეიძლება ჰქონდეთ.

Anthropic-მა ჩინეთთან დაკავშირებული სათვალთვალო ოპერაციებიც შეაჩერა. ისინი ჩინეთის ფარგლებს გარეთ მცხოვრებ უიღურებს ეხებოდა. ჩინეთის მთავრობასთან დაკავშირებული ერთი პირი თავს არაბულენოვან „ექსპერტ“ კონსულტანტად ასაღებდა. მან Claude სირიაში უიღურ შეიარაღებულ ჯგუფებში შესაღწევად, ასევე უიღური დიასპორის აქტივისტებისა და მედიის სათვალთვალოდ გამოიყენა.