აშშ ირანის ბირთვულ პროგრამაზე ინფორმაციისთვის 20 მილიონ დოლარს სთავაზობს

აშშ ირანის ბირთვულ პროგრამაზე ინფორმაციისთვის 20 მილიონ დოლარამდე ჯილდოს სთავაზობს.

სახელმწიფო დეპარტამენტის პროგრამა „ჯილდოები სამართლიანობისთვის“ ინფორმაციის მომწოდებელს შესაძლო გადასახლებასაც სთავაზობს.

პრეზიდენტმა დონალდ ტრამპმა გასულ წელს განაცხადა, რომ აშშ-ისა და ისრაელის მიერ განხორციელებული დაბომბვის კამპანიის შემდეგ ირანის ბირთვული ობიექტები „სრულად და მთლიანად განადგურდა“.

ირანი ამტკიცებს, რომ მისი ბირთვული პროგრამა მშვიდობიანია და ქვეყანას ბირთვული იარაღის შექმნა განზრახული არ აქვს.

ამასობაში, აშშ-ის სამხედრო ძალების განცხადებით, ისინი სამუშაო ჯგუფს ქმნიან, რათა გააძლიერონ ვაშინგტონის ძალისხმევა, რომელიც ირანის საზღვრებზე იარაღისა და სანქციების ქვეშ მოქცეული მასალების გადაადგილების შეზღუდვას ისახავს მიზნად.

აშშ-ის სამხედრო ძალების ცენტრალური სარდლობის განცხადებით, სამუშაო ჯგუფი „რკინის კარიბჭე“ ფლორიდის შტატის ქალაქ ტამპაში იმუშავებს და აშშ-ის მთავრობის სხვა უწყებებთან ითანამშრომლებს.

ჯგუფი იარაღის გადაადგილებასთან ერთად ორმაგი დანიშნულების საქონელსა და უკანონო შემოსავლების წყაროებზეც გაამახვილებს ყურადღებას.

ცენტრალური სარდლობის შეფასებით, ირანის პორტების საზღვაო ბლოკადამ ქვეყანას 25 მილიარდ დოლარზე მეტი ღირებულების ნედლი ნავთობის ექსპორტში ხელი შეუშალა.

სატელიტური სურათები ირანის სარაკეტო ბაზებთან მიმდინარე მასშტაბურ მშენებლობაზე მიანიშნებს

აშშ-ის სახელმწიფო დეპარტამენტის განცხადებაში ნათქვამია, რომ მრავალმილიონიანი ჯილდო ირანის პროგრამის შესახებ ინფორმაციისთვისაა განკუთვნილი, მათ შორის ობიექტების, აღჭურვილობისა და ამასთან დაკავშირებული პერსონალის შესახებ ცნობებისთვის.

განცხადებაში ნათქვამია, რომ ირანის მიერ ატომური ენერგიის საერთაშორისო სააგენტოს გარანტიებთან დაკავშირებული ვალდებულებების შეუსრულებლობამ სააგენტოს „ძირითადი კომპონენტების, მაგალითად, [ბირთვული] ცენტრიფუგების, წარმოებისა და მარაგების შესახებ ცოდნის უწყვეტობა“ დაუკარგა.

ცენტრიფუგები გამდიდრებული ურანის მისაღებადაა საჭირო. მისი გამოყენება შესაძლებელია როგორც სამოქალაქო დანიშნულების რეაქტორების საწვავად, ისე ბირთვული იარაღის დასამზადებლად, თუ გამდიდრების ხარისხი დაახლოებით 90%-ს ან მეტს მიაღწევს.

შუალედური არჩევნების შემდეგ ირანში მნიშვნელოვანი დარტყმების განახლების შესაძლებლობაზე ვარაუდები სულ უფრო მატულობდა. თუმცა, არჩევნებამდე ტრამპმა ჟურნალისტებს უთხრა, რომ ამის გაკეთებას „არ ჩქარობდა“.