თეთრ სახლთან ეჭვმიტანილი დააკავეს, მას ტრამპის მკვლელობა სურდა

აშშ-ის საიდუმლო სამსახურმა თეთრ სახლთან ეჭვმიტანილი დააკავა. შიდა უსაფრთხოების სამინისტროს პარასკევის განცხადებაში ნათქვამია, რომ სამართალდამცველებმა მამაკაცი გაჩერებულ მანქანაში აღმოაჩინეს, სადაც რამდენიმე იარაღი იყო. განცხადების თანახმად, მამაკაცმა თქვა, რომ თავში ხმები ესმოდა, რომლებიც პრეზიდენტ დონალდ ტრამპის მოკვლისკენ მოუწოდებდნენ.

დაკავება ხუთშაბათს საღამოს, თეთრი სახლის სამხრეთით, კონსტიტუშენ ავენიუზე მოხდა. საიდუმლო სამსახურის თანამშრომლებს მამაკაცმა ყურადღება მიიქცია, რადგან, მათი თქმით, ის მანქანაში „საეჭვოდ იქცეოდა“.

მალე თანამშრომლებმა დაადგინეს, რომ მამაკაცის მანქანა მოპარულად იყო გამოცხადებული. მათ სამი სხვადასხვა ცეცხლსასროლი იარაღი და ათობით ვაზნაც აღმოაჩინეს. ეჭვმიტანილს, სხვა ბრალდებებთან ერთად, იარაღის უკანონო გადატანასა და უკანონო ფლობას ედავებიან.

ეს მსგავსი შემთხვევების სერიაში ბოლო დაკავებაა. ტრამპის თეთრ სახლში დაბრუნების შემდეგ საიდუმლო სამსახურმა და სამართალდამცავმა უწყებებმა რამდენჯერმე დააკავეს ეჭვმიტანილები, რომლებიც, სავარაუდოდ, ტრამპის ან მისი ოჯახის წევრების სიცოცხლეს ემუქრებოდნენ.

შიდა უსაფრთხოების სამინისტროს განცხადების თანახმად, ეჭვმიტანილი 2024 წლის მარტში, ტეხასის შტატის გავლით, ვენესუელიდან აშშ-ში ჩავიდა და ქვეყანაში უკანონოდ იმყოფება. მის წინააღმდეგ ბრალი წარადგინეს. ამჟამად ის აშშ-ის მარშალების სამსახურის პატიმრობაშია.

შიდა უსაფრთხოების სამინისტროს დაქვემდებარებაშია საიმიგრაციო და საბაჟო აღსრულების სამსახური, ICE. მას ცენტრალური როლი აქვს ტრამპის მთავრობის მკაცრ პოლიტიკაში, რომელიც არარეგულარული მიგრაციის წინააღმდეგაა მიმართული. აშშ-ში სამსახურს აკრიტიკებენ დაკავებებისა და დეპორტაციების, ასევე სასტიკი მეთოდების გამო.