აშშ ირანული ნავთობის გაყიდვასთან დაკავშირებულ 61 მილიონ დოლარს ითხოვს

Binance-ის წარმომადგენელმა განაცხადა: „Binance სანქციების დარღვევასა და უკანონო საქმიანობას საერთოდ არ იწყნარებს და სანქცირებულ პირებთან ტრანზაქციები არ დაუშვია. ამ საკითხზე სამართალდამცავებთან თანამშრომლობას გავაგრძელებთ. სანქციებთან ან უკანონო დაფინანსებასთან დაკავშირებული რისკის გამოვლენისას ყოველთვის ჩავატარებთ გამოძიებას, საჭიროებისამებრ შევზღუდავთ ან გავყინავთ ანგარიშებს, მომხმარებლებს მომსახურებას შევუწყვეტთ და შესაბამის უწყებებს შევატყობინებთ“. სარჩელის თანახმად, Blessed Trust თავს ქონების მართვის ან ვირტუალური აქტივების შენახვის მომსახურების კომპანიად წარმოაჩენს. თუმცა, კომპანია შემოსავლებს იღებდა და რიცხავდა, ასევე მომხმარებლებს ჩვეულებრივი ვალუტის კრიპტოვალუტაში გადაცვლის მომსახურებას სთავაზობდა. ეს ოპერაციები აშშ-ში დაფუძნებული კრიპტოვალუტის გამომშვები კომპანიების გამოყენებითაც ტარდებოდა. Hexa Whale-იც მსგავს მომსახურებას ახორციელებდა და Blessed Trust-სა და მის პარტნიორებთან თანამშრომლობდა. სარჩელში ნათქვამია: „Blessed Trust-მა და Hexa Whale-მა ამ სქემის ფარგლებში ათობით მილიონი დოლარის გასაგზავნად ან მისაღებად აშშ-ის ფინანსური სისტემაც გამოიყენეს“.

სი-ენ-ბი-სიმ Hexa Whale-სა და Blessed Trust-ს კომენტარისთვის ვერ დაუკავშირდა.

ორივე კომპანიის კლიენტებს შორის ჩინეთის ნავთობისა და ნავთობპროდუქტების სექტორის კომპანიები არიან.

სარჩელის თანახმად, Tether Ltd. სამიზნე მისამართებზე არსებულ კრიპტოვალუტის ტოკენებს „გაანადგურებს“ და იმავე ღირებულების შემცვლელ ტოკენებს გამოუშვებს. შემდეგ ტოკენები აშშ-ის მთავრობის განკარგულებაში გადავა.

Tether-მა კომენტარის თხოვნას დაუყოვნებლივ არ უპასუხა.

აპრილში ვაშინგტონმა ჩინეთში დამოუკიდებელ, ე.წ. „ჩაიდნის“ ნავთობგადამამუშავებელ ქარხანას სანქციები დაუწესა. მან ფინანსური ინსტიტუტებიც გააფრთხილა, რომ სანქციები მათაც შეიძლება შეეხოს, თუ ირანული ნავთობის გადამამუშავებელ ჩინურ ქარხნებთან ითანამშრომლებენ.

როიტერსმა 10 სექტემბერს ასევე გაავრცელა ინფორმაცია, რომ ირანმა „ნავთობის გაყიდვაზე სანქციების გვერდის ასავლელად და ჩინეთიდან მილიარდობით დოლარის საქონლის შესაძენად ბარტერის მსგავსი შეთანხმება გამოიყენა“.

გავრცელებული ინფორმაციით, ჩინეთი ირანული ნავთობის ერთ-ერთი უმსხვილესი მყიდველია. 2025 წელს მასზე ირანის მიერ გემებით გაგზავნილი ნავთობის 80%-ზე მეტი მოდიოდა, რაც დღეში საშუალოდ 1,4 მილიონ ბარელს შეადგენდა.