აშშ-ის საზღვაო ქვეითები ბალტიის ზღვაში ნატოს მისიას შეუერთდნენ

აშშ-ის საზღვაო ქვეითთა დაახლოებით ოთხი ათეული სამხედრო მოსამსახურე ბალტიის ზღვაში ნატოს ხელმძღვანელობით მიმდინარე ოპერაციას შეუერთდება. ისინი რეგიონში წყალქვეშა ინტერნეტკაბელებისა და გაზსადენების დაცვას დაეხმარებიან. აშშ-ის საზღვაო ქვეითთა კორპუსმა პრესრელიზში გაამხილა, რომ ნატოს ოპერაციის, „გაძლიერებული სიფხიზლე: ბალტიის გუშაგი“, მხარდასაჭერად სპეციალიზებული გუნდის გაგზავნას გეგმავს. ეს ნაბიჯი წყალქვეშა კაბელებისადმი მზარდი ინტერესის, რუსეთის ჩრდილოვანი ფლოტის გადაადგილებისა და დივერსიის შიშის ფონზე გადაიდგა.

აშშ-ის საზღვაო ქვეითები ჩრდილოეთ კაროლინაში მდებარე ლეჟენის ბანაკის ბაზიდან იგზავნებიან. ისინი რეგიონში მოწინავე საექსპედიციო თვალთვალისა და ტაქტიკური დაზვერვის შესაძლებლობებს შექმნიან, ფინეთისა და ნატოს სხვა მოკავშირეების მხარდასაჭერად. მისიაში მონაწილეობენ მეორე სადაზვერვო ბატალიონის, საზღვაო ქვეითთა მეორე დივიზიისა და მეორე საექსპედიციო ძალის საინფორმაციო ჯგუფის სამხედროები.

ფინეთის სამხედრო-საზღვაო ძალების ოპერაციების ხელმძღვანელმა, კაპიტანმა იოჰან ტილანდერმა, განმარტა, რომ აშშ-ის საზღვაო ქვეითთა კორპუსის გამოცდილება, უნარები და სისტემები ოპერაციას, მათ შორის ბალტიის ზღვაზე დაკვირვებას, კარგად შეესაბამება.

პრესრელიზში ხაზგასმულია, რომ საზღვაო ქვეითები მხარდამჭერ როლს ასრულებენ, ხოლო ხელმძღვანელობა ევროპის ქვეყნებს ეკისრებათ. მათ რეგიონში მაღალსპეციალიზებული და მოქნილი ძალა უნდა უზრუნველყონ.

აშშ-ის საზღვაო ქვეითთა კორპუსის ევროპისა და აფრიკის ძალების მეთაურმა, გენერალ-მაიორმა დენიელ შიპლიმ, აღნიშნა, რომ მონაწილეობა აჩვენებს კორპუსის უნარს, სპეციალიზებული შესაძლებლობები სწრაფად განათავსოს იქ, სადაც ისინი ყველაზე ეფექტიანია. მისი თქმით, ეს საშუალებას მისცემს ძალებს, რეგიონში ჰიბრიდული საფრთხეების შესაკავებლად შეუფერხებლად იმოქმედონ, როგორც ერთიანმა და ბრძოლისუნარიანმა გუნდმა.

აშშ-ის სამხედროების გაგზავნის შედეგად, ოპერაცია ნატოსთვის საჭირო მონაცემების პირდაპირ მიწოდებას შეძლებს. ამისთვის დაზვერვის საზღვაო ქვეითების უნიკალურ შესაძლებლობებს გამოიყენებენ, მათ შორის მცირე უპილოტო საფრენ აპარატებსა და სანაპირო სენსორებს.

ბალტიის ზღვა ევროპული წყალქვეშა ინფრასტრუქტურის წინააღმდეგ შესაძლო თავდასხმების წინა ხაზზეა. რეგიონში კაბელების დაზიანების რამდენიმე მცდელობა იყო. 2024 წელს ფინეთს, შვედეთსა და ევროპას შორის ორი კაბელი გაწყვიტეს. ამასთან, ჩრდილოვანი ფლოტის მოქმედებებთან დაკავშირებული შეშფოთების გამო, ფინეთმა მიმდინარე წლის დასაწყისში სპეციალური საზღვაო თვალთვალის ცენტრი შექმნა, რომელიც ბალტიის ზღვაში აქტივობას აკვირდება.

აშშ-ის პრესრელიზში რუსეთი ნახსენები არ არის. თუმცა, ეს ავტორიტარული ქვეყანა რეგიონში ევროპის ერთ-ერთი უდიდესი საფრთხეა. ევროპის ქვეყნებთან მისი ურთიერთობა რამდენიმე წელია უარესდება, განსაკუთრებით მას შემდეგ, რაც 2022 წელს უკრაინასთან ომი დაიწყო. ბოლო ოთხ წელიწადსა და ექვს თვეში ევროპაში წყალქვეშა კაბელებთან ახლოს რუსული სათევზაო გემების 500-ზე მეტი შემთხვევა დაფიქსირდა. ეს აჩვენებს, რომ ისინი რეგიონის გლობალურ მონაცემთა კავშირებს გამუდმებით სწავლობენ და ადგენენ, თუმცა უშუალოდ ხელს არ უშლიან.