აშშ-ის თავდაცვის უწყება ირანთან ომისას საბრძოლო მასალის დეფიციტზე აფრთხილებს

თავდაცვის დეპარტამენტის გენერალური ინსპექტორის ანგარიშის თანახმად, პრეზიდენტ დონალდ ტრამპის ოპერაცია „ეპიკ ფიურის“ ფარგლებში ირანზე თავდასხმა პირველ ოთხ თვეში 33,4 მილიარდი დოლარი დაჯდა და საბრძოლო მასალის დეფიციტი გამოიწვია.

კონგრესისთვის წარდგენილ 44-გვერდიან ანგარიშში წერია, რომ 28 თებერვლიდან 30 ივნისამდე ირანზე აშშ-ისა და ისრაელის ერთობლივი თავდასხმისას ტრამპის ადმინისტრაციამ მხოლოდ საბრძოლო მასალაზე 22,3 მილიარდი დოლარი დახარჯა.

გენერალურმა ინსპექტორმა პლატ ბი მორინგ მესამემ დაასკვნა: „თავდასხმამ სტრატეგიულ მარაგებში დეფიციტი გამოიწვია და საბრძოლო მასალის მარაგის შესავსებად სამრეწველო ბაზის შემაფერხებელი რგოლები გამოავლინა“.

ანგარიშში ასევე ჩამოთვლილია ზიანი, რომელიც თეირანის საპასუხო დარტყმებმა აშშ-ის სამხედრო საშუალებებს მიაყენა. განადგურდა ოთხი F-15E და 30-მდე MQ-9 Reaper-ის დრონი. დაზიანდა ერთი F-35A, შვიდი KC-135 საწვავით გასამართი თვითმფრინავი და შვიდი ვერტმფრენი.

სი-ენ-ბი-სის ცნობით, F-35A მტრის ცეცხლით დაზიანებული ამ ტიპის პირველი თვითმფრინავია და მისი ჩანაცვლება 92 მილიონი დოლარი დაჯდება. აშშ-ის საჰაერო ძალების მონაცემებით, ერთი F-15E-ის წარმოება 31,1 მილიონი დოლარი ღირს. შესაბამისად, ოთხი თვითმფრინავის ჩანაცვლების ფასი 124,4 მილიონი დოლარია.

აშშ-მა კონფლიქტით გამოწვეულ საგანგებო ვითარებებზე რეაგირებისთვის კიდევ 79,2 მილიონი დოლარი დახარჯა. ანგარიშის თანახმად, ეს მოიცავდა ევაკუაციასთან დაკავშირებულ ხარჯებს სახელმწიფო დეპარტამენტის თანამშრომლებისა და მათი ოჯახების, აშშ-ის მოქალაქეებისა და უფლებამოსილი მესამე ქვეყნების მოქალაქეებისთვის.

ერაყში, ქუვეითში, საუდის არაბეთსა და არაბთა გაერთიანებულ საამიროებში აშშ-ის დიპლომატიური ობიექტებისთვის მიყენებულმა ზიანმა ხარჯს კიდევ 184 მილიონი დოლარი დაუმატა.

დამატებითი ზიანი მიადგა სამხედრო შენობებსა და ინფრასტრუქტურას სპარსეთის ყურის ქვეყნებში, რომლებიც აშშ-ის მოკავშირეები არიან: ქუვეითში, ბაჰრეინში, კატარში, არაბთა გაერთიანებულ საამიროებში, საუდის არაბეთში, ერაყში, ომანსა და იორდანიაში. ანგარიშში ამ ზიანის ღირებულება გამოთვლილი არ არის. ჯერ გაურკვეველია, აღდგება თუ არა ობიექტები და ვინ გადაიხდის სამუშაოების საფასურს.

The Independent-მა კომენტარისთვის პენტაგონს მიმართა.

სტრატეგიული და საერთაშორისო კვლევების ცენტრის (Center for Strategic and International Studies) წარმომადგენელ მარკ კანსიანს CBS News-მა ჰკითხა, ჰქონდა თუ არა აშშ-ს კვლავ საბრძოლო მასალის საკმარისი მარაგი.