აშშ-ისა და ევროპის წარმომადგენლებმა უკრაინის ომის დასრულებაზე იმსჯელეს

უიტკოფმა აშშ-ის სოციალურ პლატფორმა X-ზე დაწერა: „მოლაპარაკებები საკითხების ფართო სპექტრს შეეხო“. მათ შორის იყო ზამთრისთვის მზადებასთან დაკავშირებული უახლოესი ზომები, კერძოდ, ენერგეტიკული მდგრადობა და მარცვლეულის ექსპორტი. მხარეებმა ასევე უსაფრთხოების გარანტიები და უკრაინისა და ევროპის უსაფრთხოების გრძელვადიანი ზომები განიხილეს, რომელთა მიზანი სამომავლო კონფლიქტების თავიდან აცილებაა.

უიტკოფის თქმით, მხარეებმა უკრაინის ომისშემდგომი აღდგენისა და ეკონომიკური კეთილდღეობის მხარდაჭერაზეც იმსჯელეს, მათ შორის ევროკავშირში გაწევრიანებაზე. მან აღნიშნა: „აზრთა გაცვლა პროდუქტიული იყო და დაეხმარა მხარეებს, გამოევლინათ საკითხები, რომლებიც აშშ-ის რუსეთთან მომდევნო კონტაქტამდე დამატებით შესწავლას საჭიროებს“.

უიტკოფმა დასძინა: „მონაწილეებმა კიდევ ერთხელ დაადასტურეს საერთო ერთგულება მდგრადი მშვიდობის მისაღწევად დიპლომატიური ძალისხმევის გაგრძელებისადმი, რაც უსაფრთხოებას გააძლიერებს და ხანგრძლივი სტაბილურობისა და კეთილდღეობის შესაძლებლობებს შექმნის“.

შეხვედრის დღესვე აშშ-ის პრეზიდენტმა დონალდ ტრამპმა განაცხადა, რომ რუსეთის პრეზიდენტ ვლადიმერ პუტინთან „უაღრესად წარმატებული საუბარი“ დაასრულა.

ტრამპმა თავის პლატფორმა Truth Social-ზე დაწერა, რომ შეთანხმების თანახმად, რუსეთი „დაუყოვნებლივ მიაწვდის ამერიკულ და გლობალურ ბაზარს 300 000 ტონაზე მეტ დიზელის საწვავს, კიდევ 500 000 ტონას ნოემბერში, ხოლო შემდეგ დაუყოვნებლივ 1 000 000 ტონას“.

მოგვიანებით აშშ-ის ფინანსთა სამინისტრომ საერთო ლიცენზია გასცა. ის მომავალი წლის 7 აპრილამდე რუსული წარმოშობის დიზელის საწვავის გაყიდვასთან, მიწოდებასთან, გადმოტვირთვასა და იმპორტთან დაკავშირებულ ტრანზაქციებს დაუშვებს.