აშშ-მა უკრაინის დონეცკისა და ლუგანსკის საზღვრების შეცვლა შესთავაზა

ამერიკელმა მომლაპარაკებლებმა ცოტა ხნის წინ წამოაყენეს წინადადება, უკრაინის დონეცკისა და ლუგანსკის რეგიონების საზღვრები შეცვლილიყო. ეს რუსეთსა და უკრაინას შორის ტერიტორიული მოგვარების ნაწილია, იტყობინება „ეკონომისტი“ წყაროებზე დაყრდნობით.

გამოცემის წყაროების თანახმად, წინადადების მიხედვით, რუსეთს ორივე რეგიონზე სრულ კონტროლზე პრეტენზიის გამოცხადება შეეძლებოდა ისე, რომ უკრაინას არცერთი არაოკუპირებული ტერიტორიის დათმობა არ მოუწევდა.

„ეკონომისტის“ წყაროებმა მოლაპარაკებებისას რუსეთის „უჩვეულო მოქნილობაზეც“ ისაუბრეს. თუმცა, მათი თქმით, ეს მოქნილობა ევროპული უსაფრთხოების საკითხის განხილვის შეთავაზების შემდეგ გამოჩნდა. ახლა აშშ შიშობს, რომ მოსკოვი ამ დისკუსიებს ბრძოლის გასახანგრძლივებლად გამოიყენებს.

აშშ-ის პრეზიდენტმა დონალდ ტრამპმა 9 ნოემბერს განაცხადა: „ომის დასრულების შემდეგ უკრაინა საბოლოოდ ცოტა განსხვავებული ფორმის იქნება“.

რუსეთი მოითხოვს საერთაშორისო აღიარებას, რომ ყირიმსა და დონეცკის, ლუგანსკის, ზაპოროჟიესა და ხერსონის რეგიონებს აკონტროლებს, მათ შორის იმ ტერიტორიებსაც, რომლებსაც თავად ვერ აკონტროლებს. ოქტომბრის ბოლოს ვოლოდიმირ ზელენსკის ოფისთან დაახლოებულმა წყარომ „მედუზას“ განუცხადა, რომ ეს უკრაინისთვის მიუღებელია.

წყარომ აღნიშნა: „ჩვენ თანხმობა გვაქვს: უკრაინა საკუთარ ტერიტორიებს არ თმობს“։