აშშ ნახშირისა და გაზის ელექტროსადგურებისთვის ემისიების შეზღუდვებს აუქმებს

ზელდინმა ჟურნალისტებს უთხრა, რომ „ადამიანის ჯანმრთელობის დასაცავად“ ძალაში დარჩება უსაფრთხოების ზომები „ჰაერის სახიფათო დამაბინძურებლების“ წინააღმდეგ.

დამოუკიდებელი გარემოსდაცვითი ორგანიზაციის, კლიმატისა და ენერგეტიკული გადაწყვეტილებების ცენტრის (Center for Climate and Energy Solutions) პრეზიდენტმა ნათანიელ კიოჰეინმა ამ ნაბიჯს „უზარმაზარი უკან გადადგმული ნაბიჯი“ უწოდა.

კიოჰეინმა დასძინა: „ელექტროსადგურებისთვის ნახშირბადით დაბინძურების სტანდარტების გაუქმებით, EPA-მ სანდო სამეცნიერო და ეკონომიკური მონაცემები უგულებელყო. სააგენტომ ასევე უარი თქვა საზოგადოებრივი ჯანმრთელობისა და კეთილდღეობის დაცვის პასუხისმგებლობაზე“.

ამჟამად აშშ პლანეტის დათბობის გამომწვევი სათბურის აირების, მაგალითად, ნახშირორჟანგის, ემისიებით მსოფლიოში მეორე ადგილზეა და მხოლოდ ჩინეთს ჩამორჩება.

უახლესი ხელმისაწვდომი შეფასებების თანახმად, ენერგეტიკის სექტორზე აშშ-ის ემისიების დაახლოებით მეოთხედი მოდის. ეს ყოველწლიურად დაახლოებით 1,5 მილიარდი ტონა ნახშირორჟანგის ეკვივალენტია.

ეს ნიშნავს, რომ აშშ-ის ენერგეტიკის სექტორის ემისიები, რამდენიმე ქვეყნის გარდა, ყველა სხვა ქვეყნის მთლიან ემისიებზე მაღალია.

ბოლო რამდენიმე ათწლეულის განმავლობაში, ნახშირის გამოყენების შემცირებასთან ერთად, აშშ-ის ენერგეტიკის სექტორის ემისიები ძირითადად იკლებდა. თუმცა, გასულ წელს მაჩვენებელი ოდნავ გაიზარდა.

ტრამპი დიდი ხანია ნახშირის ენერგეტიკის აღორძინებას ემხრობა და განახლებად ენერგიას, მათ შორის, ქარისა და მზის ენერგიას, რეგულარულად აკრიტიკებს.

დღევანდელი განცხადების ზუსტი შედეგები აშშ-ის ემისიებისა და გლობალური კლიმატის ცვლილებისთვის გაურკვეველია.

ზოგიერთ მკვლევარს ეჭვი ეპარება, რომ ნახშირი ოდესმე ისე აღორძინდება, როგორც ტრამპს სურს. ისინი მიუთითებენ, რომ გასულ ათწლეულში ბევრი სუფთა ტექნოლოგიის, მაგალითად, მზის ენერგიის, ღირებულება მკვეთრად შემცირდა.

2022 წელს EPA-მ სათბურის აირების ემისიების შეზღუდვის უფლებამოსილების ნაწილი დაკარგა. უზენაესმა სასამართლომ 19 შტატისა და ქვეყნის რამდენიმე უმსხვილესი ნახშირის კომპანიის სასარგებლოდ გადაწყვეტილება მიიღო. ისინი პოლიტიკის ეკონომიკური ღირებულებით შეშფოთებული იყვნენ და ამტკიცებდნენ, რომ სააგენტოს მთელი შტატების მასშტაბით ემისიების შეზღუდვის უფლებამოსილება არ ჰქონდა.

ორშაბათის განცხადება პრეზიდენტ დონალდ ტრამპის ადმინისტრაციის უახლესი ნაბიჯია, რომელიც გლობალურ დათბობასა და კლიმატის ცვლილებასთან საბრძოლველად შემუშავებული პოლიტიკის გაუქმებას ემსახურება.

თებერვალში EPA-მ ობამას პერიოდის ისტორიული სამეცნიერო დასკვნა გააუქმა, რომლის მიხედვითაც სათბურის აირები საზოგადოებრივ ჯანმრთელობას საფრთხეს უქმნიდა. რამდენიმე შტატმა და ადგილობრივმა ხელისუფლებამ ეს გადაწყვეტილება გაასაჩივრა.

როგორ აჩქარებს ჰაერის გაწმენდა გლობალურ დათბობას და ავლენს უფრო დიდ პრობლემას

წიაღისეული საწვავის ემისიები კვლავ იზრდება, თუმცა განახლებადი ენერგიის სწრაფი განვითარება კლიმატისთვის იმედს აჩენს

თემებიდონალდ ტრამპილი ზელდინინათანიელ კიოჰეინიჯო ბაიდენიაშშ-ის გარემოს დაცვის სააგენტოკლიმატისა და ენერგეტიკული გადაწყვეტილებების ცენტრიაშშჩინეთიკლიმატის ცვლილება

გამოქვეყნდა 15 სექტემბერი, 2026