ეთიოპიამ რუსეთისგან გამანადგურებლები და საჰაერო თავდაცვის სისტემები მიიღო

ეთიოპიამ რუსეთისგან 12 Су-35 ტიპის გამანადგურებელი თვითმფრინავი მიიღო, ჩრდილოეთ ტიგრაის რეგიონში, ერიტრეასთან მოსაზღვრე ტერიტორიაზე, ბრძოლების გამწვავების ფონზე.

პრემიერ-მინისტრმა აბიი აჰმედმა, რომელიც მოსკოვში რუსეთ-აფრიკის სამიტს ესწრება, შესყიდვას „მნიშვნელოვანი ეტაპი“ უწოდა და განაცხადა, რომ ის ეთიოპიის თავდაცვისუნარიანობას გააძლიერებს.

აბიი აჰმედის თქმით, ეთიოპია და რუსეთი ამ გარიგებაზე რამდენიმე წლის წინ შეთანხმდნენ, თვითმფრინავები კი გრაფიკზე ადრე ჩავიდა. მან ასევე განაცხადა, რომ ეთიოპია მოსკოვისგან С-400 ტიპის ოთხი საჰაერო თავდაცვის სისტემის შეძენას გეგმავს.

ეთიოპიის ლიდერმა აღნიშნა, რომ სამხედრო ტექნიკა აუცილებელია ქვეყნის გარე საფრთხეებისგან დასაცავად.

აბიი აჰმედმა რუსეთის პრეზიდენტ ვლადიმერ პუტინს ეთიოპიის ახლო მეგობარი უწოდა და თქვა, რომ ეთიოპია ახლა სუბსაჰარულ აფრიკაში პირველი ქვეყანაა, რომელსაც ამგვარი „მოწინავე საბრძოლო ტექნოლოგია“ აქვს.

„თუ ამ შესაძლებლობას არ შევქმნით, ჩვენს რეგიონში ქვეყანას გადარჩენა გაუჭირდება. სათანადოდ მომზადებულ ქვეყნებს იოლად ვერ შეეწინააღმდეგები“, განაცხადა მან.

რუსეთმა და ეთიოპიამ ბოლო წლებში რამდენიმე სამხედრო შეთანხმებას მოაწერეს ხელი. მათ შორის იყო 2021 წლის შეთანხმება, რომელიც სამხედროების მომზადებასა და ტექნოლოგიების გაუმჯობესებას ითვალისწინებდა.

აბიი აჰმედმა განმარტა, რომ ეთიოპიამ რუსეთთან Су-35 ტიპის თვითმფრინავებისა და С-400 სისტემების შესყიდვის შეთანხმება რამდენიმე წლის წინ გააფორმა. მან გადაწყვეტილების მიზეზებად მსოფლიოში საჰაერო ძალების განვითარების ტენდენციები და ქვეყნის წინაშე არსებული უსაფრთხოების საფრთხეები დაასახელა.

მისი თქმით, Су-35 აღჭურვილია როგორც საჰაერო, ისე სახმელეთო სამიზნეებთან საბრძოლველად. მას შეუძლია შემომავალი ფრთოსანი რაკეტების აღმოჩენა და განეიტრალება 200 კილომეტრამდე მანძილზე.

სამხედრო დაზვერვის ანალიტიკოსმა ქალააბ სეგატუმ ბი-ბი-სის ამჰარულენოვან სამსახურს განუცხადა, რომ დამატებითი თვითმფრინავების შეძენა მნიშვნელოვანი ნიშანია იმისა, რომ ეთიოპია სხვა ქვეყნებთან შესაძლო ომისთვის ემზადება და არა მხოლოდ შიდა კონფლიქტებისთვის.

სეგატუს თქმით, თვითმფრინავები მეტად მანევრულია და დიდი ტერიტორიების დაფარვა შეუძლია. რადარები კი საჰაერო უპირატესობის მოპოვებისა და შორ მანძილზე დაკვირვების საშუალებას იძლევა.

სეგატუმ აღნიშნა, რომ გამანადგურებელი თვითმფრინავებისა და საჰაერო თავდაცვის სისტემების ერთობლიობა მნიშვნელოვან შესაძლებლობას ქმნის დიდი ქალაქებისა და კრიტიკული ინფრასტრუქტურის, მათ შორის რენესანსის კაშხლის, დასაცავად და საჰაერო უპირატესობის მოსაპოვებლად.