აშშ-ში გათბობის ზეთის ხარჯი ზამთარში 21%-ით გაიზრდება

აშშ-ის ენერგეტიკული ინფორმაციის ადმინისტრაციამ (U.S. Energy Information Administration) სამშაბათს ზამთრის საწვავის ყოველწლიური პროგნოზი გამოაქვეყნა. მისი მონაცემებით, გათბობის ზეთის ფასი ზამთრის გათბობის სეზონზე ერთ გალონზე საშუალოდ 5,26 დოლარი იქნება. ეს გასულ ზამთართან შედარებით 34%-ით მეტია. თუმცა სააგენტო უფრო თბილ ზამთარსაც პროგნოზირებს, რამაც შესაძლოა მოხმარება შეამციროს. ამ ორი ფაქტორის გათვალისწინებით, ნოემბრიდან მარტის ჩათვლით ზეთის მომხმარებელი საშუალო ოჯახი 2 115 დოლარს დახარჯავს. ეს გასულ წელთან შედარებით დაახლოებით 21%-ით მეტია.

ჰიუსტონში მდებარე საკონსულტაციო კომპანია ლიპოუ ოილ ასოშიეიტსის (Lipow Oil Associates) პრეზიდენტმა ენდი ლიპოუმ განაცხადა: „სამწუხაროდ, მომხმარებელი ფასის მკვეთრ ზრდას იგრძნობს, როცა მიწოდების კომპანია ცივი ამინდისთვის მოსამზადებლად მის ავზს შეავსებს“. კომპანია ნავთობგადამამუშავებელი ქარხნების მუშაობაზეა სპეციალიზებული.

ლიპოუს თქმით, ზრდა დისტილატური საწვავის გლობალურ ბაზარზე უჩვეულოდ შეზღუდულ მიწოდებას უკავშირდება. ამ კატეგორიაში გათბობის ზეთი და დიზელი შედის, რომლებიც, როგორც წესი, ერთი და იგივე პროდუქტია. რუსეთსა და ახლო აღმოსავლეთში ნავთობგადამამუშავებელი ქარხნების მუშაობის შეფერხებებმა გლობალური მიწოდება შეზღუდა. ამას ჩინეთიდან საწვავის ექსპორტის შემცირებაც დაემატა. შედეგად, ფასები გაიზარდა და ზოგი ანალიტიკოსი მათ მაღალ დონეზე 2027 წლამდე დარჩენას ელოდება.

სხვა საწვავით გათბობის მომხმარებელი ოჯახებისთვის პროგნოზი უკეთესია. ბუნებრივი აირით გათბობის საშუალო ხარჯი ამ ზამთარში 640 დოლარი იქნება, რაც 9%-ით ნაკლებია. პროპანის მომხმარებელი ოჯახების საშუალო ხარჯი 3%-ით შემცირდება და 1 246 დოლარს შეადგენს. ელექტროენერგიით გათბობის საშუალო ხარჯი კი გასულ წელთან შედარებით 4%-ით გაიზრდება და 1 196 დოლარს მიაღწევს.

მთავრობის მონაცემებით, გათბობის ზეთს ოჯახების შედარებით მცირე წილი, დაახლოებით 3%, იყენებს. მისი მოხმარება ძირითადად ჩრდილო-აღმოსავლეთშია თავმოყრილი. რეგიონში ზეთით დაახლოებით 3,4 მილიონი ოჯახი თბება. ეს ქვეყნის მასშტაბით ზეთის მომხმარებელი 4,1 მილიონი ოჯახის დაახლოებით 82%-ია.

გათბობის რეალური ხარჯი დიდწილად ამინდზე იქნება დამოკიდებული. დაბალი ტემპერატურა ოჯახების მიერ ენერგიის მოხმარებას ზრდის, მაშინაც კი, თუ საწვავის ფასი უცვლელი რჩება.

თუმცა ენერგეტიკული ინფორმაციის ადმინისტრაცია ჩრდილო-აღმოსავლეთში ამ ზამთარს შედარებით თბილ ამინდს ელოდება. სააგენტოს მონაცემებით, ამის გამო გათბობის ზეთის საერთო მოხმარება 9%-ით შემცირდება, მიუხედავად იმისა, რომ მასზე დანახარჯი გაიზრდება.

უფრო მძიმე პროგნოზი სექტემბრის ბოლოს ენერგეტიკული დახმარების დირექტორთა ეროვნულმა ასოციაციამ (National Energy Assistance Directors Association) გამოაქვეყნა. ორგანიზაცია შტატების იმ თანამდებობის პირებს წარმოადგენს, რომლებიც დაბალშემოსავლიანი ოჯახებისთვის ენერგეტიკული დახმარების ფედერალურ პროგრამას მართავენ. ასოციაციის შეფასებით, ზეთით სახლის გათბობის საშუალო ხარჯი ამ ზამთარში დაახლოებით 50%-ით გაიზრდება. გასული წლის 1 749 დოლარის ნაცვლად, ის 2 627 დოლარს მიაღწევს.