Axios: უიტკოფი და კუშნერი ომის დასრულების ახალ გეგმებს მოსკოვში წარადგენენ

Axios-ის ცნობით, უიტკოფი და კუშნერი თვის ბოლომდე რუსეთში გამგზავრებასაც გეგმავენ. ისინი „ახალ იდეებს“ რუსეთის ხელმძღვანელობასთან განიხილავენ.

ორივე წარმომადგენელმა ახალი წინადადებები აშშ-ის პრეზიდენტ დონალდ ტრამპს უკვე წარუდგინა. შეხვედრა 8 ოქტომბერს თეთრ სახლში გაიმართა. მას აშშ-ის ფინანსთა სამინისტროს ხელმძღვანელი, გაერთიანებული სამეფოს, საფრანგეთისა და გერმანიის ეროვნული უსაფრთხოების მრჩევლები, ასევე ნატოსა და ევროკავშირის წარმომადგენლები ესწრებოდნენ.

გამოცემის წყაროებს „ახალი წინადადებების“ დეტალები არ გაუმჟღავნებიათ.

უიტკოფი და კუშნერი მოსკოვს ბოლოს 5 სექტემბერს ეწვივნენ. შემდეგ ისინი კიევში გაემგზავრნენ, სადაც უკრაინის პრეზიდენტ ვოლოდიმირ ზელენსკის შეხვდნენ.

აშშ-ის სახელმწიფო მდივანმა მარკო რუბიომ ოქტომბრის დასაწყისში განაცხადა, რომ რუსეთის მიერ უკრაინაში დაწყებული ომის მშვიდობიანი მოგვარების პერსპექტივა ამჟამად არ ჩანს. მან ვითარებას „სტრატეგიული ჩიხი“ უწოდა. კრემლმაც განაცხადა, რომ ამჟამად მოვლენების ასეთი განვითარების საფუძველი არ არის. თავის მხრივ, ზელენსკიმ თქვა, რომ აშშ რუსეთის ხელისუფლების მოლაპარაკების მაგიდასთან დასასმელად საკმარისს არ აკეთებს.