ჩრდილოეთ კორეამ აღმოსავლეთ სანაპიროსთან ბალისტიკური რაკეტები გაუშვა

სამხრეთ კორეის გაერთიანებულ შტაბთა კომიტეტმა (JCS) განაცხადა, რომ შაბათს, დილის დაახლოებით 5:20 საათზე, რამდენიმე რაკეტის გაშვება დააფიქსირა. რაკეტები ჩრდილოეთ კორეის აღმოსავლეთ სანაპიროზე მდებარე ვონსანის რაიონიდან გაუშვეს. მათ დაახლოებით 250 კილომეტრი (155 მილი) გაიარეს. კომიტეტის ცნობით, უწყება გაშვებების შესახებ ინფორმაციას აშშ-სა და იაპონიას აქტიურად უცვლის.

სამხრეთ კორეის პრეზიდენტის ეროვნული უსაფრთხოების სამსახურმა განაცხადა, რომ გაშვების შემდეგ თავდაცვის სამინისტროსთან, JCS-სა და სხვა შესაბამის უწყებებთან საგანგებო შეხვედრა გამართა.

აშშ-ის წყნარი ოკეანის სარდლობის განცხადებით, ჩრდილოეთ კორეის მიერ რაკეტების გაშვება აშშ-ის ტერიტორიასა და მის მოკავშირეებს უშუალო საფრთხეს არ უქმნის. სარდლობამ დასძინა, რომ ვაშინგტონი სამხრეთ კორეისა და რეგიონში სხვა მოკავშირეების დაცვას კვლავაც ერთგულად ემსახურება.

რაკეტები სამხრეთ კორეის მიერ აშშ-სა და იაპონიასთან ხუთდღიანი ერთობლივი საზღვაო წვრთნების დასრულებიდან ერთი დღის შემდეგ გაუშვეს. წვრთნები ჩრდილოეთ კორეაზე იყო ორიენტირებული.

ორშაბათს წვრთნების დაწყებიდან რამდენიმე საათში ჩრდილოეთ კორეის თავდაცვის მინისტრმა კიმ სონ გიმ ისინი გააკრიტიკა. მინისტრმა გააფრთხილა, რომ ჩრდილოეთ კორეას შეეძლო, „ძალის პოზიციიდან ძლიერი და საპასუხო კონტრზომები“ მიეღო.

გასული თვის ბოლოს ჩრდილოეთ კორეამ სამხრეთ კორეის სანაპიროსთან, საერთაშორისო წყლებში ე.წ. Freedom Edge-ის წვრთნების ჩატარების გეგმები დაგმო. ფხენიანმა ისინი საკუთარი თავისა და რეგიონის სხვა ქვეყნებისთვის „საფრთხედ“ შეაფასა.

ჩრდილოეთ კორეამ 20 აგვისტოსაც ზღვის მიმართულებით რაკეტების ზალპი განახორციელა. ამას ხელი ვერ შეუშალა აშშ-ის პრეზიდენტ დონალდ ტრამპის შეთავაზებამ. ტრამპმა განაცხადა, რომ წელს ჩრდილოეთ კორეის ლიდერ კიმ ჩენ ინთან შეხვედრას გეგმავდა.

ბირთვული იარაღის მქონე ჩრდილოეთ კორეის მიერ აგვისტოში რაკეტების გაშვებისას სამხრეთ კორეა და აშშ ყოველწლიური სამხედრო წვრთნების, Ulchi Freedom Shield-ის, შემცირებულ ვერსიას ატარებდნენ. წვრთნები ტრამპის ბრძანებით შეამცირეს.

ტრამპმა წვრთნებს ჩრდილოეთ კორეის მიმართ „შეუფერებელი და მტრული“ უწოდა. მისმა ბრძანებამ რეგიონში აშშ-ის მოკავშირეები შეაშფოთა.

ფხენიანი აშშ-ისა და სამხრეთ კორეის ერთობლივ წვრთნებს დიდი ხანია შეჭრის რეპეტიციებად მიიჩნევს. ის წვრთნების პერიოდში ხშირად რაკეტებს უშვებს.