ევროკავშირი ბავშვებისთვის ჩატბოტების ემოციურ ფუნქციებს კრძალავს

ეს წესები ევროკავშირის ბავშვთა აქტის ნაწილი იქნება, რომელიც ხუთშაბათს წარადგინეს. დოკუმენტი სოციალურ მედიასა და ვიდეოგაზიარების პლატფორმებზე არასრულწლოვანთა წვდომის მსგავს შეზღუდვებსაც ითვალისწინებს. 13 წლამდე ბავშვებს მეურვის ზედამხედველობის გარეშე ჩატბოტებზე წვდომა აეკრძალებათ. ციფრულ პლატფორმებს პროდუქტებში ბავშვთა უსაფრთხოების ზომების ჩაშენებაც მოუწევთ. წინააღმდეგ შემთხვევაში, მათ მთლიანი გლობალური ბრუნვის 6%-მდე ჯარიმა დაეკისრებათ. ამის შესახებ უაირდის (WIRED) მიერ ნანახ კანონპროექტში წერია.

ახალი წესებით, ევროკავშირში მოქმედ ჩატბოტებს სხვადასხვა საუბრის ფარგლებში მომხმარებელთან ურთიერთობის დამახსოვრებაც აეკრძალებათ. ევროკომისიას აშფოთებს, რომ ასე სისტემებმა შესაძლოა დროთა განმავლობაში არასრულწლოვანთა მგრძნობიარე მონაცემები დააგროვონ და საზიანო ურთიერთქმედების ფორმები გაამყარონ.

კანონპროექტი ასევე დაადგენს, რომ სოციალური ქსელების, ვიდეოგაზიარების პლატფორმებისა და თამაშების მომწოდებლებმა ხელოვნური ინტელექტის ჩატბოტები ავტომატურად არ უნდა გაააქტიურონ. მათ არც ამ სერვისების გამოყენება უნდა წაახალისონ. დოკუმენტის მიხედვით, არასრულწლოვნის საკონტაქტო სიის თავში ხელოვნური ინტელექტის თანამოსაუბრეებისა და ზოგადი დანიშნულების სასაუბრო ჩატბოტების ავტომატურად განთავსებაც დაუშვებელი იქნება. ამას Snapchat-ი (Snapchat) აკეთებდა.

წინადადება მხოლოდ ხელოვნური ინტელექტის თანამოსაუბრეებსა და ზოგადი დანიშნულების სასაუბრო ჩატბოტებს ეხება. ევროკომისიის შეფასებით, ისინი არასრულწლოვანთა ჯანმრთელობას, უსაფრთხოებასა და კეთილდღეობას სერიოზულ საფრთხეს უქმნიან. ბრიუსელში დაფუძნებული უფლებადამცველი ჯგუფის, ევროპული ციფრული უფლებების (European Digital Rights), პოლიტიკის მრჩეველი სიმეონ დე ბრაუერი ამ ზომებს მიესალმება. თუმცა, მან უაირდს უთხრა, რომ მათი მხოლოდ ახალგაზრდებით შემოფარგვლა აზრს მოკლებულია. დე ბრაუერმა იკითხა: „განა ყველა არ ვიმსახურებთ დაცვას ხელოვნური ინტელექტისგან, რომელიც დამოკიდებულების გამოსაწვევადაა შექმნილი, ემოციურ დამოკიდებულებას აჩენს ან მომხმარებლებისთვის ნაგულისხმევად აქტიურდება და თავს ეხვევა?“ ევროკავშირის ცნობით, ციფრული სამართლიანობის აქტი, რომლის წარდგენაც მოგვიანებით წელს იგეგმება, დამოკიდებულების გამომწვევი დიზაინის წინააღმდეგ უფრო ფართო ზომებს გაითვალისწინებს.

უაირდის მიერ ნანახ დოკუმენტებში ევროკომისია აღნიშნავს, რომ ჩატბოტებზე დამოკიდებულებამ შესაძლოა ბავშვის განვითარებასა და სხვა ადამიანებთან ურთიერთობაზე უარყოფითად იმოქმედოს. მას ასევე აშფოთებს, რომ ჩატბოტები არასრულწლოვნებს სახიფათო რჩევებს აძლევენ, მათ შორის ფსიქიკურ ჯანმრთელობასა და პიროვნულ განვითარებაზე. ევროკომისიის შეფასებით, ამან შესაძლოა სარისკო ქცევა ჩამოაყალიბოს და წაახალისოს.