ევროკავშირი კლიმატის რისკებთან გასამკლავებლად ეროვნულ გეგმებს ითხოვს

ევროკავშირის ქვეყნებმა უნდა შეიმუშაონ ეროვნული სტრატეგიული გეგმები, რათა მოერგონ გლობალური ტემპერატურის მატებას, რომელიც 2050 წლისთვის 2 გრადუსს, ხოლო 2100 წლისთვის 3 გრადუსს მიაღწევს, პრეინდუსტრიულ დონესთან შედარებით. ამას ითვალისწინებს კლიმატური მდგრადობის ახალი ჩარჩო, რომელიც ევროკომისიამ მიიღო. ის გათბობის საერთო ტრაექტორიას ადგენს და პირველად აკისრებს ქვეყნებს პასუხისმგებლობას პრევენციაზე. ეროვნული გეგმები ეკონომიკის სხვადასხვა სექტორს უნდა მოიცავდეს. მონიტორინგი ევროპულ სემესტრსაც დაუკავშირდება, რათა მდგრადობა განიხილონ ეკონომიკური და არა მხოლოდ გარემოსდაცვითი საკითხის სახით.

ეროვნულმა ხელისუფლებებმა გადაწყვეტილებების მიღებისას კლიმატური რეალობა და რისკები უნდა გაითვალისწინონ, თუმცა ბრიუსელი დედაქალაქებს კონკრეტულ გადაწყვეტილებებს არ მოახვევს თავს. კლიმატური მდგრადობის ჩარჩო საკანონმდებლო ინიციატივასა და არასავალდებულო კომუნიკაციას ითვალისწინებს. მიღებული გეგმა ახალ ფინანსურ რესურსებს არ ითვალისწინებს. ამის ნაცვლად, ბრიუსელმა 2028-2034 წლების მრავალწლიანი ფინანსური ჩარჩოს ფარგლებში კლიმატისა და ბუნებრივი ბიომრავალფეროვნებისთვის ხარჯების 35%-იანი მიზანი შესთავაზა. ეს მიზანი კლიმატის ცვლილებებისთვის მზადებასაც მოიცავს.

ჩარჩო საერთო საორიენტაციო ტრაექტორიას ადგენს, რომელიც კლიმატის ცვლილების სამთავრობათაშორისო ჯგუფის სამეცნიერო მტკიცებულებებს ეფუძნება. ამ სცენარის მიხედვით, ტემპერატურა 2050 წლისთვის 2 გრადუსით, ხოლო 2100 წლისთვის 3 გრადუსით მოიმატებს. ეს პოლიტიკური მიზანი კი არა, საერთო საორიენტაციო სცენარია. წევრ ქვეყნებს მისი საფუძველზე შეუძლიათ გადაწყვეტილებების მიღებისას კლიმატთან დაკავშირებული მომავალი რისკები შეაფასონ.

საჯარო უწყებების დასახმარებლად ევროკომისია კლიმატური მდგრადობის ევროპულ ონლაინპლატფორმას შექმნის. პლატფორმა სხვადასხვა ინსტრუმენტს გააერთიანებს. მათ შორის იქნება „ევროპული კლიმატის დამთვალიერებელი“ (European Climate Viewer), რომელიც კლიმატის საშუალოვადიანი პროგნოზების ევროპულმა ცენტრმა შეიმუშავა. ის მთელ კონტინენტზე მოსალოდნელი კლიმატური რისკების ინტერაქტიულ რუკას შემოგვთავაზებს.

პლატფორმაზე ასევე განთავსდება „კლიმატური მდგრადობის ინსტრუმენტების გზამკვლევი“ (Navigator of Climate Resilience Tools). ის გარემოს დაცვის ევროპულმა სააგენტომ შეიმუშავა, რათა მომხმარებლებს დაეხმაროს, ადგილმდებარეობის, საქმიანობის სექტორისა და კონკრეტული რისკების მიხედვით მათთვის შესაფერისი ინსტრუმენტები იპოვონ.

ბრიუსელის ცნობით, უახლოეს თვეებში ევროკომისია სიცხის ტალღების წინააღმდეგ ევროპულ გეგმას, კლიმატური რისკების დაზღვევის ალიანსსა და წყლის ევროპულ ინიციატივას წარადგენს. ის ასევე შექმნის კატასტროფებისთვის მზადების საკონსულტაციო ჯგუფ PreparEU-ს და წამოიწყებს ინიციატივას, რომლის მიზანიც კლიმატის ცვლილების მიმართ ყველაზე მოწყვლადი 100 ევროპული ტერიტორიის გამოვლენაა. 2028 წელს ევროკავშირის კლიმატური მდგრადობის სტრატეგიული გეგმის წარდგენაც დააანონსა.