აშშ იაპონიის სამხედრო ბაზაზე BYD-ის ავტომობილებს კრძალავს

აშშ-ის სამხედროების ცნობით, კადენას საავიაციო ბაზაზე ელექტრომობილებზე დაწესებული შეზღუდვა მიტანის სერვისის მძღოლებსა და ტაქსებსაც ეხება.

აშშ-ის სამხედროების განცხადებით, იაპონიაში მდებარე ერთ-ერთ უდიდეს საზღვარგარეთის სამხედრო ბაზაზე ჩინური ელექტრომობილების მწარმოებელი BYD-ის ავტომობილები უსაფრთხოების მოსაზრებით აკრძალეს.

აკრძალვა ამ კვირაში ამოქმედდა კადენას საავიაციო ბაზაზე, რომელიც იაპონიის სამხრეთ კუნძულ ოკინავაზე მდებარეობს. ამან გააძლიერა ვარაუდები, რომ მსგავსი ზომები შესაძლოა აშშ-ის სხვა სამხედრო ობიექტებზეც დაწესდეს. ეს ვაშინგტონის იმ კამპანიის ნაწილია, რომელიც ჩინურ ტექნოლოგიებს ეხება და რომლის გამოყენებითაც, აშშ-ის ეჭვით, შესაძლოა სენსიტიური ინფორმაციის შეგროვება ხდებოდეს.

კადენაში აშშ-ის საჰაერო ძალების მე-18 ფრთის წარმომადგენელმა, ვიცე-პოლკოვნიკმა ალი სტორმერმა განცხადებაში აღნიშნა: „ეს ავტომობილები ჩვენი პერსონალისა და მისიისთვის მიუღებელ და აღმოუფხვრელ საფრთხეს წარმოადგენს“.

მედიის ცნობით, შეზღუდვა BYD-ის ყველა ავტომობილს ეხება, მათ შორის კერძო ავტომობილებს, ტაქსებსა და მიტანის მანქანებს. ბაზის ჭიშკართან განლაგებულ უსაფრთხოების თანამშრომლებს დაავალეს, BYD-ის ავტომობილები არ შეეშვათ და მძღოლებისთვის უკან დაბრუნება ეთხოვათ.

კადენა აღმოსავლეთ აზიაში აშშ-ის უდიდესი საჰაერო ძალების ბაზაა. ის უშუალოდ მიიღებდა მონაწილეობას ჩინეთთან, რუსეთთან ან ჩრდილოეთ კორეასთან დაკავშირებულ კრიზისზე რეაგირებაში.

ბაზაზე განთავსებულია მძლავრი სარაკეტო სისტემა „ტაიფუნი“, რომელსაც, როგორც იუწყებიან, 1 600 კმ-მდე მანძილზე „ტომაჰოკის“ რაკეტების გაშვება შეუძლია. ამ რადიუსში ჩინეთისა და რუსეთის ზოგიერთი რაიონიც ხვდება. ბაზაზე ასევე განთავსებულია გამანადგურებლები და თვითმფრინავები, რომლებიც ჰაერში საწვავის შესავსებად, თვალთვალისა და დაზვერვისთვის გამოიყენება, ნათქვამია ბაზის ვებგვერდზე.

სამხრეთკორეული საინფორმაციო სააგენტო „იონჰაპის“ ცნობით, ეს გადაწყვეტილება უკავშირდება ავტომობილებში დამონტაჟებული ტექნოლოგიების, მათ შორის კამერების, სენსორებისა და GPS-მოწყობილობების მეშვეობით ინფორმაციის გაჟონვის საფრთხეს.

აშშ-ის სამხედრო მაღალჩინოსნებს კონკრეტული საფრთხე არ დაუსახელებიათ. თუმცა, აკრძალვა უფრო ფართო ზომების ნაწილია, რომლებსაც აშშ და დასავლეთის სხვა ქვეყნები ჩინური ჭკვიანი ტექნოლოგიების შესაზღუდად იღებენ. ეს ტექნოლოგიები ავტომობილებში, მობილურ ტელეფონებსა და სხვა მოწყობილობებში გამოიყენება და არსებობს შიში, რომ მათი მეშვეობით მფლობელებს უთვალთვალებენ.

ივნისში პენტაგონმა BYD იმ 188 ჩინური კომპანიის სიაში შეიყვანა, რომლებსაც, მისი შეფასებით, ქვეყნის სამხედროებთან კავშირი აქვთ. ამან პეკინის პროტესტი გამოიწვია. შავ სიაში ასევე არიან ავტომწარმოებელი Nio, ელექტრონული კომერციის კომპანია Alibaba და ინტერნეტკომპანია Baidu.