უკრაინული დრონების იერიშს ბელგოროდში ერთი ადამიანი ემსხვერპლა

ღამით რუსეთმა უკრაინას 153 მოიერიშე დრონით შეუტია. მათ შორის იყვნენ „შაჰედის“ ტიპის, S8000 Banderol/Dan-T-ის, Gerbera-სა და Parodiya-ს ტიპის სატყუარა დრონები. ამის შესახებ კიევის სამხედროები იტყობინებიან.

წინასწარი მონაცემებით, საჰაერო თავდაცვის ძალებმა მტრის 119 დრონი ჩამოაგდეს ან გაანეიტრალეს. რუსეთის იერიშმა ვინიცასა და მის მიმდებარე რეგიონზე ზიანი და ელექტროენერგიის ნაწილობრივი გათიშვა გამოიწვია.

ვინიცის ოლქის ადმინისტრაციის ხელმძღვანელმა ნატალია ზაბოლოტნამ ტელეგრამზე დაწერა, რომ მტრის იერიშის შედეგად დაზიანდა სამოქალაქო სამრეწველო ობიექტი და კერძო სახლი. მისივე თქმით, დაშავებულების შესახებ ინფორმაცია არ მიუღიათ. ამის შესახებ ღამით გამოქვეყნებულ შეტყობინებაში ეწერა.

შაბათს საღამოს რუსული დრონების იერიშს ხარკოვის ნოვობავარსკის რაიონში ერთი ადამიანი ემსხვერპლა, ოთხი კი დაშავდა. ამის შესახებ ქალაქის მერმა იგორ ტერეხოვმა სოციალურ ქსელში განაცხადა, წერს „უკრაინსკა პრავდა“.

მხარეები ერთმანეთს საპასუხო იერიშებსაც აყენებენ. ადგილობრივი ოფიციალური პირებისა და სოციალურ ქსელებში გამოქვეყნებული თვითმხილველთა ვიდეოების მიხედვით, ღამით უკრაინულმა დრონების დიდმა ჯგუფმა რუსეთის ბელგოროდის ოლქს შეუტია. ამის შესახებ Kyiv Independent-ი წერს. ადგილობრივების თქმით, დრონების უმეტესობა ბელგოროდის ცენტრში ერთ კონკრეტულ უბანზე იყო კონცენტრირებული.

სათვალთვალო არხ Exilenova-Plus-ის ცნობით, სამიზნე სავაჭრო ცენტრი MegaGrinn იყო, ბელგოროდის უდიდესი სავაჭრო-გასართობი კომპლექსი. Kyiv Independent-ის ცნობით, MegaGrinn-ში 200-ზე მეტი მაღაზია, სუპერმარკეტი, კინოთეატრი და რესტორნებია. ღამის იერიშის დროს ცენტრი დაკეტილი და ცარიელი იყო. რუსეთის საინფორმაციო სააგენტო „რია ნოვოსტის“ ცნობით, მიუხედავად ამისა, დაშავებულები არიან.

რეგიონული ოპერატიული ცენტრის ცნობით, რომელიც პლატფორმა Max-ზე გამოქვეყნდა, იერიშის შედეგად ერთი ადამიანი დაიღუპა, ათი კი დაშავდა. ამის შესახებ რუსეთის საინფორმაციო სააგენტო „რია ნოვოსტი“ წერს. პოსტში ნათქვამია: „ბელგოროდში დრონებით თავდასხმების შედეგად ერთი მშვიდობიანი მოქალაქე დაიღუპა. ათი ადამიანი დაშავდა, მათ შორის სასწრაფო სამედიცინო დახმარების თანამშრომელი“. ათი დაშავებულიდან რვა საავადმყოფოში გადაიყვანეს.