გაერო ჰუსიების ტყვეობაში თანამშრომლის დაღუპვის გამოძიებას მოითხოვს

გაერომ იემენში, ჰუსიების პატიმრობაში მყოფი თანამშრომლის დაღუპვის გამოძიება მოითხოვა.

გაეროს ადამიანის უფლებათა უმაღლესი კომისრის ოფისის (OHCHR) თანამშრომელი იემენში, მოჰამად ელ-შამი, თვეზე მეტი ხნის წინ დაიღუპა. გაეროს შაბათს გავრცელებული განცხადების თანახმად, ოჯახს ამის შესახებ მხოლოდ ცოტა ხნის წინ აცნობეს.

ჰუსიებს არ უთქვამთ, როგორ დაიღუპა ელ-შამი, თუმცა მისმა ოჯახმა „სიმართლე უნდა იცოდეს“, განაცხადა გაეროს ადამიანის უფლებათა უმაღლესმა კომისარმა ვოლკერ თურქმა.

ადამიანის უფლებათა უმაღლესმა კომისარმა ჰუსიების ხელისუფლებისგან „სრული გამჭვირვალობა“ მოითხოვა. მან ასევე მოითხოვა ელ-შამის დაღუპვის „სასწრაფო, დამოუკიდებელი და საფუძვლიანი გამოძიება“.

ელ-შამი ჰუსიების პატიმრობაში თვითნებურად ჰყავდათ 2024 წლის ივნისიდან. მაშინ ის და გაეროსა და სხვა არასამთავრობო ორგანიზაციებთან მომუშავე 60-ზე მეტი ადამიანი დააკავეს. მათ ბრალი დასდეს „ამერიკულ-ისრაელურ ჯაშუშურ ქსელში“ მონაწილეობაში.

თურქმა განაცხადა, რომ „ასევე სერიოზულად შეშფოთებულია“ OHCHR-ის კიდევ შვიდი თანამშრომლის ბედით. ისინი ელ-შამისთან ერთად დააკავეს და კვლავ პატიმრობაში რჩებიან. „კიდევ ერთხელ მოვუწოდებ, დაუყოვნებლივ და უპირობოდ გაათავისუფლონ ისინი“.

გაეროს გენერალურმა მდივანმა ანტონიო გუტერეშმა შაბათს ცალკე განცხადებაში თქვა, რომ ელ-შამის დაღუპვამ „შეძრა“ და გამოძიების მოთხოვნით თურქს შეუერთდა.

გუტერეშის თქმით, გაერო ჯგუფისგან „სასწრაფოდ ცდილობს პასუხების მიღებას“ მისი დაღუპვის გარემოებების შესახებ.

ელ-შამი ჰუსიების პატიმრობაში დაღუპული გაეროს მეორე თანამშრომელია. მანამდე, 2025 წლის თებერვალში, მსოფლიო სასურსათო პროგრამის თანამშრომელი დაიღუპა.

ჰუსიებს სულ 72 გაეროს თანამშრომელი და არასამთავრობო ორგანიზაციების მუშაკი ჰყავთ დაკავებული, მათ შორის ელ-შამი.

გაერომ 2025 წლის თებერვალში ჰუსიების მიერ კონტროლირებად იემენის ნაწილებში მუშაობა შეაჩერა, რადგან თანამშრომლების უსაფრთხოებასთან დაკავშირებით შეშფოთება ჰქონდა.

მეამბოხე დაჯგუფებას მანამდე ზოგიერთი დაკავებული სატელევიზიო არხებით წარუდგენია საზოგადოებისთვის. მათ დასავლეთის სადაზვერვო სააგენტოებთან და ისრაელთან თანამშრომლებად წარმოაჩენდნენ.

6 ოქტომბერს გაერომ განაცხადა, რომ მსოფლიო სასურსათო პროგრამის თანამშრომელი გათავისუფლდა მას შემდეგ, რაც ირანის მხარდაჭერილმა დაჯგუფებამ ის „თვითნებურად დააკავა“.