კანადამ და ევროკავშირმა ახალი ალიანსი შექმნეს

კარნიმ ხუთშაბათს განაცხადა: „ჩვენ არ ველოდებით, რომ ხელოვნური ინტელექტის მომავალს სხვაგან, ჩვენთვის უცნობი ან არასანდო ადამიანები გადაწყვეტენ“.

ბრიუსელმა და ოტავამ პარასკევს ასევე გამოაცხადეს შეთანხმება, რომელიც კანადას ევროპის სუპერკომპიუტერულ ქსელში ჩართავს. ეს კანადელებს ხელოვნური ინტელექტის მოდელების გასაწვრთნელად ევროპულ კომპიუტერებზე წვდომას მისცემს.

კანადისა და ევროკავშირის ლიდერებმა გლობალური წესრიგის შეცვლასა და გაურკვევლობისთვის გამკლავების მსურველი თანამოაზრე ქვეყნებისთვის უსაფრთხო თავშესაფრის შექმნაზე ისაუბრეს. მათ ახალი, უფრო ღრმა ურთიერთობა მოსახლეობის მთავარი საზრუნავის, მათ შორის ცხოვრების ხარჯის, მოგვარების საშუალებადაც წარმოაჩინეს.

ფონ დერ ლაიენმა აღნიშნა: „როცა ვაჭრობა ეკონომიკური ზეწოლის იარაღად იქცევა, ფასს ოჯახები იხდიან, სუპერმარკეტის თაროდან დაწყებული, ახალი ავტომობილის ღირებულებით დამთავრებული“. მისი თქმით, ენერგიის, კრიტიკულად მნიშვნელოვანი მინერალებისა და ნახევარგამტარების მომწოდებლები, რომლებსაც ადრე ენდობოდნენ, „სულ უფრო ხშირად იქცევიან ზეწოლის ინსტრუმენტებად“.

კარნიმ იმავე დღეს უფრო ადრე თქვა: „მეტი კონკურენცია, მეტი არჩევანი“. მისი თქმით, ალიანსმა შეიძლება მიწოდების ჯაჭვების საიმედოობის განმტკიცებისა და „ერთად შოკებისთვის გამკლავების“ გზები გამონახოს.

ლიდერებმა კვლავ წამოჭრეს კანადის ასოცირებული წევრობის შესაძლებლობა. ფონ დერ ლაიენის თქმით, ასეთი სტატუსი ჯერ არავის ჰქონია. მან დასძინა: „ჩვენ გვაქვს ამბიცია, ნდობა და შემოქმედებითი უნარი, რომ ის ერთად ჩამოვაყალიბოთ.

„ეს [ასოცირებული წევრობა] არავის წინააღმდეგ მიმართული პარტნიორობა კი არა, ჩვენი ერთობლივი ძალისხმევის გაძლიერებაა“.

ლიდერები ასოცირებული წევრობის იდეას დაეთანხმნენ, თუმცა განაცხადეს, რომ ამ როლის უფრო მკაფიო ფარგლებს 2027 წლის სამიტზე განსაზღვრავენ. ევროკავშირის ზოგიერთი წევრი უკმაყოფილო იყო იმის გამო, რომ კანადას შესაძლოა მიენიჭოს იურიდიული ძალის არმქონე სტატუსი, რომელიც, მათი შიშით, წევრობის მსურველ სხვა ქვეყნებს დააბნევს. გერმანია და სხვა ქვეყნები კულისებში მუშაობდნენ, რათა ეს ფრაზა სამიტის განცხადების პროექტიდან ამოეღოთ. თუმცა ფონ დერ ლაიენი, რომელმაც ეს ტერმინი პირველად წამოაყენა, და კარნი სამიტზე კვლავ საუბრობდნენ „ასოცირებულ წევრობაზე“.

ევროპული საბჭოს პრეზიდენტმა ანტონიო კოშტამ კი მანამდე თქვა, რომ კანადა „არაევროპულ ქვეყნებს შორის ყველაზე ევროპულია“. ეს მოსაზრება ასახავდა რწმენას, რომ გეოგრაფიის მიუხედავად, მხარეებს საერთო ღირებულებები აერთიანებთ.

კოშტამ თქვა, რომ ორივე მხარე შეეცდება შექმნას „ყველაზე ახლო, ყველაზე ღრმა და ყველაზე ძლიერი პარტნიორობა, რაც კი ოდესმე ევროკავშირსა და არაევროპულ ქვეყანას შორის ყოფილა“.

თუმცა სამიტის გამართვამ კვებეკის პროვინციაში დაძაბულობა გამოიწვია. იქ სეპარატისტულმა პარტიამ, „პარტი კებეკუამ“, ცოტა ხნის წინ უმცირესობის მთავრობა ჩამოაყალიბა. კვებეკის პრემიერ-მინისტრი პოლ სენ-პიერ პლამონდონი ღონისძიებას არ დაესწრო, რადგან ოტავამ მას საჯაროდ გამოსვლის უფლება არ მისცა.

სენ-პიერ პლამონდონმა კვირის დასაწყისში სოციალურ ქსელში დაწერა: „ფედერალურ მთავრობას სურს დაგვაჯეროს, რომ კვებეკის პრემიერისთვის მიღებაზე კრევეტების კოქტეილების მირთმევის ნებართვა კვებეკის ინტერესების წარმოსადგენად მისაღები და საკმარისი გავლენაა“.

მისი თქმით, ფედერალურმა მთავრობამ კვებეკს სთხოვა, „კვლავ რიგში ჩამდგარიყო, კვებეკის ვასალიზაციისა და უხილავად ქცევის სანაცვლოდ, რასაც ეს გულისხმობს, და წვეულების უკეთესი ადგილიდან ყურების შესაძლებლობა მიეღო“.

თემებიილონ მასკიმარკ კარნიურსულა ფონ დერ ლაიენიAleph Alpha GmbHCohere IncStarlinkStarshieldევროკავშირიმომავლის ალიანსიკანადა

გამოქვეყნდა 1 ნოემბერი, 2026